सरकारले कोरोनाविरुद्धको खोप अभियान आजदेखि सुरु गरेको छ । सोहि अभियान अन्तर्गत आजेदेखि रामेछाप जिल्लामा पनि कोरोनाविरुद्धको खोप लगाउन थालिएको छ । जिल्ला अस्पताल रामेछापमा अस्पतालका डाक्टर रोशन ग्वाछा र स्वास्थ्य कार्यालय रामेछापका प्रमुख जितेन्द्र कुमार कर्णले खोप लगाउँदै जिल्लामा खोप अभियानको सुरुवात गर्नुभयो । खोपका बारेमा धेरै आशंका देखिएकाले खोप सुरक्षित रहेको सन्देश दिन आफूहरुले पहिलो खोप लगाएको उहाँहरुले बताउनुभयो ।
जिल्लामा कोरोनाविरुद्धको खोप लगाउन १४ सय ७७ जनाले नाम दर्ता गराएका छन । खोप केन्द्रमा खटिने सुरक्षाकर्मी तथा स्वयंसेवक, फोहरमैला व्यवस्थापनमा खटिने फोहर सङ्कलक तथा चालक,शव व्यवस्थापनमा खटिने व्यक्ति, स्वास्थ्य स्वयंसेविका,वृद्धाश्रमका व्यक्ति तथा हेरचाहमा खटिने कर्मचारी एवं कारागारका कैदी र सुरक्षाकर्मीलाई खोप दिइनेछ ।
प्रधानमन्त्री केपी शर्मा ओलीले आज बिहान भर्चुअल माध्यमबाट खोप अभियानको सुभारम्भ गर्नुभएको हो ।काठमाडौ उपत्यकाका १७ वटासहित देशभर १ सय २० केन्द्रबाट खोप उपलब्ध गराउने स्वास्थ्य तथा जनसंख्या मन्त्रायले जनाएको छ । भारत सरकारको अनुदानमा माघ ८ गते १० लाख मात्रा खोप नेपाल ल्याइएको हो । स्वास्थ्य मन्त्रालयले पहिलो चरणको खोप अभियान सुरु गरेको १० दिनभित्र अभियान सम्पन्न गर्नेछ । पहिलो चरणमा चार लाख ३० हजारलाई खोप दिइने मन्त्रालयले जनाएको छ ।
