रामेछापमा विवाहको भोज खाएका एकै गाउँका ३० जना बिरामी परेका छन् । रामेछाप नगरपालिका–५ रामपुर साईटारका ३० जना बिरामी परेका हुन् । यहि मंसिर २५ गते रामपुर साईटारमा बिहेको भोज खाएकाहरु बिरामी पर्न थालेको त्यहाँका स्थानिय कनक मगरले बताउनुभयो ।
जिल्ला अस्पतालमा १४ जनालाई ल्याएर भर्ना गरिएको छ । उक्त गाउँका ३० जना बढी बिरामी रहेको र केहीलाई अस्पताल ल्याउने तयारी भैरहेको मगरले बताउनुभयो । बिहे भोज खाएका बालबालिका र वृद्धवृद्धाहरु बढी बिरामी परेको अर्का स्थानिय कालि मगरले बताउनुभयो ।
बिरामीहरुमा पेट दुख्ने, टाउको दुख्ने, पखाला लाग्रे, बान्ता आउने समस्या देखिएको अस्पतालका विशेषज्ञ डाक्टर मनोज यादवले बताउनुभयो । बिरामी भएकाहरुको अवस्था भने सामान्य रहेको छ । जिल्ला अस्पतालले गाउँका सबै बिरामी भएको जानकारी पाए लगतै दु्रत व्यवस्थापन समिति बनाएर औषधि र चिकित्सक सहितको टोली रामपुर साईटार पठाएको अस्पताल व्यवस्थापन समितिका अध्यक्ष यम पाख्रिनले बताउनुभयो । रामपुर साईटार मगर जातिहरुको बसोबास रहेको गाउँ हो ।
