जिल्ला अस्पताल रामेछापलाई अब गुरुयोजना अनुसार विकास गरिने भएको छ । ५ वर्षे गुरुयोजना बनाएर अस्पतालको विकास गर्न लागिएको अस्पताल विकास समितीका अध्यक्ष रोशन पाख्रिनले बताउनुभयो ।
अस्पतालको गुरुयोजना नबन्दा बजेट,जनशक्ति व्यवस्थापन,विशेषज्ञ चिकित्सक सहितको उपचारमा समस्या भएको अध्यक्ष पाख्रिनले बताउनुभयो । गुरुयोजना अनुसार विकास गर्दा सेवा ब्यवस्थापनमा सहज हुने अस्पतालका निमित्त मेडिकल सुपरीटेण्डेन्ट डा.पवन शाक्यले बताउनुभयो ।
५ वर्षे गुरु योजना तयार गर्नका लागी अस्पताल विकास समितीले आज एक अन्तरकृया कार्यक्रमको आयोजना गरेको हो । उक्त कार्यक्रममा अस्पताल विकासका लागी गुरुयोजनामा समेट्नुपर्ने विभिन्न सुझावहरु सरोकारवालाहरुबाट संकलन गरिएको छ । रामेछापका प्रमुख जिल्ला अधिकारी दिपक कुमार पहाडीले अस्पतालले गुरुयोजना बनाउँदा सबैकुराहरु समेटेर गुरुयोजना बनाउनुपर्ने बताउनुभयो ।
उहाँले तिनै तहको सरकारसँग समन्वय र सहकार्य गरेर गुरुयोजना तयार गर्न अस्पताल विकास समितीलाई आग्रह पनि गर्नुभएको छ । अस्पतालको गुरुयोजना बनाउन हाम्रो गौरव हाम्रो रामेछाप नामक संस्थाले सहजीकरण गर्ने छ । गुरुयोजना बनेपछि आर्थिक प्रस्ताव र जनशक्ति योजना सहित गुरुयोजनालाई दाता र सरकारलाई पेश गरिने छ ।
