स्वास्थ्य तथा जनसङ्ख्या मन्त्रालयले काठमाडौं उपत्यका सहित ठूला सहरका विद्यालयहरू कम्तिमा एक महिना बन्द गर्न सिफारिस गरेको छ । मन्त्रालयका सचिव लक्ष्मण अर्यालले उपत्यका सहित १५ वटा जिल्लाका ठूला सहरमा रहेका विद्यालय एक महिना बन्द गर्नका लागि सिसिएमसीमा प्रस्ताव गरेको जानकारी दिनुभयो ।
काठमाडौं उपत्यका सहित पोखरा, विराटनगर, वीरगन्ज सहित १५ वटा ठूला सहरमा सङ्क्रमण फैलन सक्ने भएकोले कम गर्न खोजेको उहाँले बताउनुभयो । उहाँले विद्यालय सहित पार्टी प्लालेस, मन्दिर, सिनेमा हल, रात्रिकालीन व्यवसाय पनि बन्द गर्न सिफारिस गरिएको उहाँले बताउनुभयो ।
विद्यालय बन्द गर्ने प्रस्ताव पुगे पनि सिसिएमसीले भने अहिलेसम्म यसबारे ठोस निर्णय लिएको छैन । पछिल्लो समय कोरोना भारइसको नयाँ भेरियन्ट्स फैलिएको र यसबाट बालबालिका समेत उच्च जोखिममा रहेको पाइएपछि मन्त्रालयले विद्यालय बन्द गर्न सिफारिस गरेको हो ।
यसैबीच, स्वास्थ्य तथा जनसंख्या मन्त्री हृदयेश त्रिपाठीले नेपालमा कोरोना सङ्क्रमणको जोखिम भएता पनि बन्दाबन्दीको स्थिति आउन नदिने नै प्रयास गरिरहेको बताउनुभएको छ । एक वर्षको अनुभव, तयारी र पूर्वाधार भएकाले त्यसलाई प्रभावकारी बनाइ बन्दाबन्दी हुन नदिने भन्ने प्रयत्न गर्ने मन्त्री त्रिपाठीले बताउनुभयो ।
स्वास्थ्य पत्रकार मञ्चले आज गरेको भेटघाटमा उहाँले कोरोना सङ्क्रमणको जोखिम अत्यधिक बढ्दै गएको बताउँदै एन्टिजेन परीक्षणहरु बढाएको उहाँको भनाइ छ ।जेठ र असार सम्म कोरोना सङ्क्रमितको संख्या उच्चतम बिन्दुमा पुग्ने सक्ने आंकलन छ ।
मन्त्री त्रिपाठीले दैनिक ११ हजार पुग्न सक्ने र सक्रिय सङ्क्रमितको संख्या ६ लाख पुग्ने प्रक्षेपण रहेको बताउनुभयो । काठमाडौं उपत्यकामा ७ देखि ८ लाख विद्यार्थीहरु रहेको र शहरी क्षेत्रमा अनलाइन कक्षा सञ्चालन गर्न प्रस्ताव गरेको जानकारी दिनुभयो ।
