भोलि हुने निर्वाचनका लागि जिल्ला प्रशासन कार्यालय रामेछापले मतदान स्थलमा सुरक्षा व्यवस्था कडा बनाएको छ । रामेछापको २५ वटा मतदान स्थललाई अति संवेदनशील वर्गको वर्गीकरण भएसँगै ती मतदानस्थलमा सुरुक्षा व्यवस्था कडा पारिएको जिल्ला निर्वाचन कार्यालय रामेछापले जानकारी दिएको छ ।
जिल्ला प्रशासन कार्यालयले निर्वाचन लक्षित ‘एकीकृत सुरक्षा योजना’ कार्यान्वयनमा ल्याएसँगै अति संवेदनशील र संवेदनशील केन्द्रमा वर्गीकरण गरी सुरक्षा चुनौतीको ख्याल गरेर सुरक्षा व्यवस्था कडा पारिएको रामेछापका प्रमुख जिल्ला अधिकारी दिपक कुमार पहाडीले बताउनुभयो ।
उहाँले मतदाताहरुलाई ढुक्क भएर मतदानमा सहभागी हुन आग्रह गर्नुभएको छ । ९२ वटा मतदान स्थल र २ सय २३ वटा मतदान केन्द्र रहेको रामेछापमा २६ वटा मतदान केन्द्रलाई संवेदनशील निर्धारण गरिएको छ । जिल्लाको आठ वटा स्थानीय तहको मतगणना स्थलमा सीसी क्यामेरा पनि जडान गरिएको छ । स्थानीय तह निर्वाचनलाई लक्षित गरी जिल्लाभर मादक पदार्थ बिक्री वितरण र सेवनमा पनि प्रतिवन्ध लगाइएको छ ।
जिल्लामा सबै मतदान केन्द्रमा निर्वाचनको तयारी पूरा भएको छ । दुई दिन अघि नै सबै मतदान केन्द्रका कर्मचारी र सुरक्षाकर्मीहरू तोकिएको क्षेत्रमा पुगिसकेका छन । सबैजना आ आफ्नो क्षेत्रमा पुगेर मतदान केन्द्रको व्यवस्थापन, सर्वदलीय बैठक सम्पन्न गरि मतदाता परिचय पत्र समेत वितरण गरिसकिएको मुख्य निर्वाचन अधिकृतको कार्यालय रामेछापले जानकारी दिएको छ ।
