नेपाल शिक्षक संघ रामेछाप नगर कार्यसमितिको छैँठौँ स्थानीय प्रतिनिधि सभा कार्यक्रम आज सम्पन्न भएको छ । संघका रामेछाप नगर अध्यक्ष निम बहादुर श्रेष्ठको अध्यक्षता र रामेछाप नगरपालिकाका प्रमुख लबश्री न्यौपानेको प्रमुख आतिथ्यतामा कार्यक्रम भएको हो ।
उक्त कार्यक्रममा बोल्दै रामेछाप नगरपालिकाका प्रमुख लबश्री न्यौपानेले शिक्षकहरुलाई जिम्मावार भएर काममा लाग्न निर्देशन दिनुभयो । उहाँले नगरपालिकाले शिक्षा क्षेत्र सुधारको लागी धेरै कामको सुरुवात गरेको भएपनि कतिपय आधारभूत विद्यालयमा विद्यार्थी संख्या निकै न्यून रहेको बताउनुभयो ।
रामेछाप नगरपालिकाका प्रबक्ता समिर कार्कीले शिक्षकको भूमिका हरेक क्षेत्रमा महत्वपूर्ण रहेको बताउनुभयो । नेपाल शिक्षक संघले शिक्षा क्षेत्र सुधारको लागी नेतृत्वदायी भूमिका निर्वाह गर्नुपर्ने उहाँको भनाई छ ।
संघका रामेछाप नगरका सचिव खिल बहादुर कार्कीले हालसम्म गरेका कामहरु र भावी कार्यक्रमहरुको बारेमा जानकारी गराउनुभयो । नेपाल शिक्षक संघका जिल्ला उपाध्यक्ष मोति तमाङ्ग र जिल्ला सचिव मेघ प्रसाद भट्टराईले नेपाल शिक्षक संघ पेशागत हकहितका लागी मजबुद रहेको बताउनुभयो ।
संघको आफनै भवन र सहकारी समेत रहेको उहाँहरुले बताउनुभयो । संघको जिल्ला कार्यसमितिमा १ हजार २५ र नगर कार्यसमितिमा २ सयभन्दा बढी शिक्षक सदस्यहरु आबद्ध रहेका छन । छैँठौँ स्थानीय प्रतिनिधि सभा कार्यक्रमको अवसरमा ३ जना जेष्ठ सदस्यहरुलाई सम्मान गरिएको छ ।
सम्मानित हुनेहरुमा मान बहादुर मोक्तान,गुणराज पोखरेल र काले माझि रहेका छन । हरेक वर्ष नियमित रुपमा हुँदै आएको प्रतिनिधि सभा कार्यक्रममा संघमा आबद्ध शिक्षकहरुको समस्या र गुनासोहरु सुन्ने,ति गुनासोहरुको सम्बोधन खोज्ने जस्ता विविध विषयमा छलफल हुने गरेको छ ।
