लमजुङको मर्स्याङ्दी गाउँपालिका ४, काप्रे भिरबाट मर्स्याङ्दीमा खसेर बेपत्ता भएका रामेछापको लिखु तामाकोसी गाउँपालिका ४, विजुलीकोटका अनन्त महतको अवस्था अझै अज्ञात छ । लमजुङको बेंसीसहरदेखि मनाङतर्फ जाँदै गरेको ग१ज ७३३५ नम्बरको जिपमा सवार ३२ वर्षीय सशस्त्र प्रहरी जवान अनन्त महत पिसाब गर्ने क्रममा लड्दा मर्स्याङ्दी नदीमा खस्नुभएको थियो ।
सशस्त्र प्रहरी बल आश्रित गुल्म लमजुङका डीएसपी मानबहादुर शाहीका अनुसार खोजीकार्यका लागि बेंसीसहरबाट सशस्त्र प्रहरी र नेपाल प्रहरीको टोली खटिएको छ । यहि पुस १५ गतेदेखी बेपत्ता भएका महतको खोजि कार्य भैरहेको भएपनि फेला पार्न नसकिएको लमजुङ प्रहरीले जनकारी दिएको छ । महत सशस्त्र प्रहरीको २२ नम्बर गण महेश्वरी भक्तपुरबाट सरुवा भएर ३२ नम्बर गुल्म हेडक्वार्टर चामे मनाङ जाँन लाग्नुभएको थियो ।
