यहि वैशाख ३० गते हुने स्थानीय तह निर्वाचनका लागि रामेछापका सबै पालिकामा निर्वाचन अधिकृतको कार्यालय स्थापना गरिएको छ । आज जिल्लाका सबै स्थानीय तहमा निर्वाचन अधिकृतको कार्यालय स्थापना गरिएको छ ।
वैशाख ३० गतेका लागि तोकिएको निर्वाचनका लागि रामेछाप सहित देशभर एकैपटक कार्यालय स्थापना गरिएको हो । जिल्लाको ८ वटै स्थानीय तहमा कार्यालय स्थापना गरिएको जिल्ला निर्वाचन कार्यालयले जनाएको छ । निर्वाचन अधिकृतहरू नियुक्तिपत्र लिएर पालिकास्तरमा खटिइसकेका छन् ।
रामेछाप नगरपालिकामा गिता गुरुङ,मन्थली नगरपालिकामा डा.दिवाकर भट्ट,खाँडादेवी गाउँपालिकामा बासुदेव लम्साल,गोकुलगंगा गाउँपालिकामा रामप्रसाद पौडेल,सुनापती गाउँपालिकामा लक्ष्मण उपाध्याय घिमिरे,उमाकुण्ड गाउँपालिकामा योगेन्द्र प्रसाद ढुंगेल,दोरम्बा शैलुङ गाउँपालिकामा पे्रमराज पौडेल र लिखु तामाकोशी गाउँपालिकामा तारादेवी महर्जनले निर्वाचन अधिकृतको जिम्मेवारी सम्हाल्नुभएको छ ।
निर्वाचन अधिकृतको कार्यालयमा निर्वाचन अधिकृत, सहायक निर्वाचन अधिकृत, सहायक कर्मचारी, लेखापाल, कम्प्युटर अपरेटर, सवारी चालक, कार्यालय सहयोगी, पीएसओ (निजी सुरक्षा अधिकारी) सहित नौ जना कर्मचारी रहनेछन् ।
