यही वैशाख ३० मा हुने स्थानीय तहको निर्वाचनमा के कसरी तालमेल गर्ने भन्ने बारेमा छलफल गर्न सरकारमा सहभागी दलहरूको बैठक आज बस्ने तयारी भएको छ । यद्यपी समय भने टुङ्गो नलागेको नेताहरूले बताएका छन् । एकीकृत समाजवादीका नेता जगन्नाथ खतिवडाले आज छलफल गरेर निर्णयमा पुग्ने तयारी भए पनि प्रधानमन्त्री तथा काँग्रेस सभापति शेरबहादुर देउवाको व्यस्तताका कारण समय अझैँ निश्चित नभएको जानकारी दिनुभयो । सत्ता बठबन्धन दलबीच चुनावमा तालमेल गरेर जाने भन्नेमा यसअघि निर्णय भए पनि कुन स्वरुपको तालमेल गर्ने भन्नेमा अहिलेसम्म पनि सहमति जुटेको छैन ।
कमजोर नआँक्न एकीकृत समाजवादीको चेतावनी
स्थानीय तहको निर्वाचनमा तालमेल गर्ने सरकारमा सहभागी दलहरूको सहमति कार्यान्वयन जटिल बन्दै गएको छ । विशेषगरी नेपाली काँग्रेसका जिल्लास्तरका नेताहरूको दवावका कारण शीर्ष नेतृत्व तालमेलमा बाध्य पार्न नहुने निचोडमा पुग्न थालेको छ । यद्यपी सभापति तथा प्रधानमन्त्री शेरबहादुर देउवा भने तालमेलको सहमति कार्यान्वयन गर्नुपर्ने दवावमा हुनुहुन्छ ।
काँग्रेसको हिजोको केन्द्रीय कार्यसम्पादन समितिको बैठकमा नेताहरूले तालमेलका लागि बाध्य पार्न नहुनेमा जोड दिएका छन् । हिजोको बैठकमा महामन्त्री विश्वप्रकाश शर्माले यसअघि काँग्रेसको समर्थनमा माओवादी केन्द्रका उम्मेदवार विजयी भएको स्थानमा यसपाली काँग्रेसले उम्म्ेदवारी दिनुपर्ने त्यसो नभए एक्लाएक्लै प्रतिस्पर्धा गर्नुपर्ने प्रस्ताव गर्नुभएको छ । काठमाडौँ महानगरपालिकामा पनि गठबन्धनबाटको उम्मेद्वार हुने टुङ्गो लागेको छैन ।
पोखरा महानगरमा गठबन्धनबाट नेकपा एसले दाबी गरिरहँदा निर्णय भइसकेको छैन । सरकारमार रहेको दल नेकपा एकीकृत समाजवादीले भने आफूहरूलाई हेप्न खोजिएको निष्कर्ष निकाल्दै त्यसो नगर्न चेतावनी दिएको छ । अध्यक्ष माधवकुमार नेपालले आफूहरू निर्णायक शक्ति भएको दावी गर्दै कम ठानिए परिणाम नराम्रो हुने हिजो काठमाडौँमा आयोजित एक कार्यक्रममा बताउनुभएको थियो । सत्तामा रहेका दलको आआफ्नै अडानका कारण उम्म्ेदवार छनोट, प्रचारप्रसारमा समस्या भएको नेताहरूले बताएका छन् ।
