रामेछापको रामेछाप नगरपालिकाले साँघुटार सेलेघाट सडक आयोजनालाई छिटो भन्दा छिटो काम सक्न निर्देशन दिएको छ ।
सेलेघाट साँघुटार सडक निर्माणका लागि रामेछाप नगरपालिका प्रमुख नर ब थापा मगरको संयाेजकत्वमा सडक निर्माणकाे ठेक्का जिम्मा लिएकाे भारतिय कम्पनी TCIL का प्रमुख तथा सराेकारवालाहरुकाे उपस्थितिमा छलफल गरी तत्काल सडक निर्माण कार्य गर्ने प्रतिबद्धता सहितकाे निर्णय गरिएको छ ।
रामेछाप नगरपालिकामा आज जनप्रतिनिधि,राजनीति दल,पत्रकार,आयोजना प्रमुख सहितको छलफलमा नगर प्रमुख नर ब थापा मगरले यतिका वर्ष भैसक्दा पनि आयोजनाले निकै सुस्त गतिमा काम गरेको भन्दै समयमै काम सक्न आयोजनालाई आग्रह गर्नुभयो ।
यहि आयोजनाको भर परेकै कारण रामेछाप बजारको सडक अस्तव्यस्त भएको भन्दै उहाँले सडक निर्माण,मुआब्जा वितरणको काम तत्काल अघि बढाउन आग्रह गर्नुभयो ।
सडक निर्माणकाे ठेक्का जिम्मा लिएकाे भारतिय कम्पनी TCIL का प्रमुख एके चौधरीले समयमै सडक निर्माणको काम सक्ने बताउनुभयो । नेपालमा सडक निर्माणको जिम्मा लिएको मुख्य ठेकेदारले समयमै काम नगरिँदा काम सुस्त भएको चौधरीको भनाइ छ ।
आयोजनाका प्रमुख ईश्वर कार्कीले सडक निर्माणको काम २० प्रतिशत सकिएको बताउनुभयो । अब बाँकी काम पनि २०२३ भित्रै सकिने गरि अघि बढ्ने उहाँले बताउनुभयो ।
सेलेघाट रामेछाप बजार हुँदै साँघुटारसम्म पिच हुने ५० किलोमीटर सडकको काम केहि महिनादेखि बन्द छ ।
सडक आयोजनामा काम गर्ने पेटी ठेकेदारहरुले आफुहरुले काम गरेको पैसा नपाएको भन्दै काम ठप्प पारेर बसेका छ्न । पैसा नपाएसम्म कुनै पनि हालतमा काम अघि नबढाउने स्थानीय ठेकेदार सुवास थापाले बताउनुभयो ।
सेलेघाट साँघुटार सडक आयोजनाको काम ७ वटा पेटी ठेकेदारहरुले गर्दै आएका थिए ।उनीहरुले ६ महिना अघि आयोजनाको कार्यालयमा काम गरेको रकम नपाएको भन्दै ताला लगाएका थिए । सोही समयदेखि नै सडक निर्माणको काम बन्द छ ।
