माथिको तस्विरमा देखिएको भिड राष्ट्रिय वाणिज्य बैँक रामेछाप डाँडा शाखामा सामाजिक सुरक्षा भत्ता लिन लाईनमा बसेका ६० वर्ष कटेकाहरूको हो । समाजिक सुरक्षा भक्ता बैँक खातामा आयो रे भन्ने सुन्ने बित्तिकै विहान १० नबज्दै बैँकमा वृद्धवृद्धहरु लाईन बस्छन । माघको यो जाडोमा कठ्याङग्रीएर लाईनमा बसेका अधिकांशले मास्क लगाएका छैनन् । केहीले चिउँडोमा अड्याएका छन् । लाइन अव्यवस्थित छ । सामाजिक दुरी कसैले पालना गरेको छैन । बरु सबै जना झुरुप्प भएर बसेका छन । कोरोना संक्रमण तिव्र रुपमा फेलिरहेको यो अवस्थामा वृद्धवृद्धाहरु संक्रमणको जोखिममा छन ।
रामेछापका धेरै स्थानिय तहका वृद्धवृद्धाहरु यसरी नै लाईनमा बसेर समाजिक सुरक्षा भत्ता लिईरहेका छन । थरथर काप्दै लाईनमा बसेका धेरैले निकै दुख कष्टका साथ भत्ता लिन टाढा टाढाबाट आएको बताए । रामेछाप नगरपालिकाको ९ वटा वडाहरु मध्ये ८ वटावडाका वृद्धवृद्धाहरु यसैगरी बैँकमा आएर लाईनमा बसेर समाजिक सुरक्षा भत्ता लिँदैआएका छन । तर वडा नं ७ सुकाजोरको काम भने उदाहरणिय छ । वडा नं ७ ले जेष्ठ नागरीक,अशक्त,अपाङ्ग,एकल महिला,लोपन्मुख हायु जातिले पाउँदै आएको भत्ता टोलटोलमै पुगेर वितरण गरिरहेको छ ।
वडाका समाजिक सुरक्षा भक्ता लिँदै आएका नागरीकहरुलाई सहज होस भनेर आफुहरुले लक्ष्मी बैँक मन्थली शाखासँगको सहकार्यमा टोलटोलमै पुगेर समाजिक सुरक्षा भत्ता वितरण गरिरहेको वडाअध्यक्ष समिर कार्कीले बताउनुभयो । शाखा रहित बैङ्किङग सेवा मार्फत लक्ष्मी बैँकसँगको सहकार्यमा टोलटोलमा पुगेर भक्ता वितरण गरेपछि सुकाजोरका नागरीक पनि खुशी भएका छन ।
सुकाजोर ७ का धनमायाँ मगरलाई वडाका कर्मचारीहरुले घरमै गएर भत्ता दिए । रामेछाप बजारमा बैँकमा वृद्धवृद्धाहरु लाईनमा बसेर भत्ता लिएको देख्नु भएको उहाँले घरमै भत्ता पाउँदा हर्षका आँशु खसाल्नुभयो । अनि भन्नुभयो–हाम्रो भोट खेर गएनछ ।
सुकाजोर पालेवनका गोपाल ब महताराले पनि वृद्धा भत्ता लिँदै आउनुभएको छ । हरेक पटक टोलमै आएका वडाका कर्मचारीहरुमार्फत भत्ता लिनुभएका उहाँले शनिबार घरमै वृद्ध भत्ता पाउनुभयो । उहाँले भन्नुभयो– “केहि दिनपछि बुबाको श्राद्ध गर्न पैसा थिएन । घरमै आएर भत्ता दिए । म धेरै खुशी छु ।”
सुकाजोरका ज्येष्ठ नागरिक, एकल महिला र शारीरिक अशक्तता भएका व्यक्तिहरु र्बैँकमा गएर लाईन बस्नुपर्ने झन्झट तथा सास्तीबाट मुक्त छन । जिल्लाका अरु स्थानिय तहका वडाहरुले पनि रामेछाप नगरपालिका वडा नं ७ सुकाजोरबाट केही पाठ सिक्नसके बैँकमा भत्ता लिन आउनेहरुको भिड कम हुने थियो । नागरीकहरुले घरदैलोमै सेवा पाउने थिए ।
