निर्वाचन आयोगले स्थानीय तहको निर्वाचन वैशाखमै गर्न सरकारसमक्ष प्रस्ताव गरेको छ । आसन्न निर्वाचनको तयारीलाई लिएर प्रधानमन्त्री शेरबहादुर देउवासँग हिजो भेटघाट गरेको आयोगका पदाधिकारीले आउँदो वैशाख २० गते भित्रमा स्थानीय तहको निर्वाचन गर्ने प्रस्ताव गरेको हो ।
आयोगले वैशाख १४ मा निर्वाचन गर्न सरकारसँग औपचारिक प्रस्ताब राखेको छ । यदि एकै चरणमा नभ्याईएको खण्डमा दोस्रो चरणको निर्वाचन २२ गते गर्न सकिने बारेमा पनि जानकारी गराएको निर्वाचन आयोगका प्रवक्ता शालिग्राम शर्मा पौडेलले जानकारी दिनुभयो । स्थानीय तह निर्वाचन ऐन, २०७३ को व्यवस्था बमोजिम २०७९ जेठ ५ गते स्थानीय तहका पदाधिकारीहरुको पदावधि समाप्त हुँदै छ ।
स्थानीय तह निर्वाचन ऐन, २०७३ को दफा ३ बमोजिम कार्यकाल समाप्त हुनुभन्दा २ महिना अगावै निर्वाचन हुनुपर्ने व्यवस्थालाई हेरी निर्वाचनको तयारी गरेको आयोगले जनाएको छ । यस्तै छलफलमा राष्ट्रियसभामा रिक्त १९ सदस्यका लागि यही माघ १२ गते हुने निर्वाचनका बारेमा पनि छलफल भएको छ । निर्वाचनमा स्थानीय तहका १४९३ जना र प्रदेश सभामा ५३२ जना गरी २०२५ मतदाता रहेका छन् ।
