आजपनि १२ वर्षमाथिका बालबालिकालाई कोरोनाविरुद्धको मोर्डना खोप लगाइँदैछ । हिजोबाट देशभरका ५७ जिल्लामा सुरु भएको कोरोनाविरुद्धको खोप अभियान आजपनि जारी छ ।
विशेषगरी १२ वर्षदेखि १८ वर्ष मुनिका बालबालिकालाई सरकारले हिजोबाट कोरोनाविरुद्धको मोडर्ना खोप लगाउन सुरु गरेको हो । स्वास्थ्य सेवा विभाग परिवार कल्याण महाशाखा अन्तर्गतको खोप शाखाले आ–आफ्नो विद्यालयमा अनिवार्य खोप लगाउन आग्रह गरेको छ ।
पुस १३ गतेसम्म मोडर्नाको खोपको पहिलो मात्रा लगाइने भएकाले सबै स्थानीय तहलाई पत्राचार गरिएको महाशाखाले जनाएको छ । मोडर्ना खोप लगाएको ३ देखि ४ हप्तापछि दोस्रो मात्रा लगाउनुपर्ने भएकाले सरकारले सोही अनुसार स्थानीय सरकारलाई खोप अभियान सुरु गर्न यसअघि नै परिपत्र गरिसकेको छ ।
खोपको दोस्रो मात्रा माघ २ देखि १२ गतेसम्म लगाइने छ । बालबालिकालाई लगाइने खोप अभियान विद्यालयमा सञ्चालन भइरहेकाले थप सहज भएको छ ।
