रामेछापको रामेछाप नगरपालिका वडा नं ५ रामपुरको खानीडाँडाका वर्ष २३ कि रिना श्रेष्ठलाई रामेछाप प्रशासनले घरमै पुगेर नागरिकता प्रदान गरेको छ ।
शारीरिक रुपमा पुर्ण अपांग रहेकी श्रेष्ठलाई रामेछापका प्रमुख जिल्ला अधिकारी दिपक कुमार पहाडी,रामेछापका प्रहरी प्रमुख नवराज ढुंगाना सहितको टोली उहाँको घरमै पुगेर नागरिकता प्रदान गरेको हो । वडा नं ५ का वडा अध्यक्ष भिम ब तामाङको पहलमा शारीरिक रुपमा पुर्ण अपांग रहेकी श्रेष्ठको घरमै पुगेर नागरिकता प्रदान गरिएको प्रजिअ पहाडीले बताउनुभयो ।
जिल्लाका अन्य स्थानीय तहहरुमा पनि शारीरिक रुपमा पुर्ण अपांग भएर नागरिकता लिनबाट बन्चित कोहि नागरिक भए जनप्रतिनिधिले पहल गरेमा आफुहरु त्यहाँ पुगेर नागरिकता प्रदान गर्ने प्रजिअ पहाडीले ईरामेछाप डटकमलाई बताउनुभयो ।
साथै मंगलबार नै रामपुरमा जिल्ला प्रहरी कार्यलयले नागरिक सुनुवाइ कार्यक्रम पनि गरेको छ । उक्त कार्यक्रममा रामपुरमा प्रहरी चौकी स्थापना गरिदिन नागरिकहरुले माग गरेको वडा अध्यक्ष भिम ब तामाङले जानकारी दिनुभयो । प्रहरी कार्यालय रामेछापका प्रमुख नवराज ढुँगानाले नागरिकहरुको माग सम्बोधन गर्ने प्रयास गरिने बताउनुभयो ।
