दोस्रो चरणको खोप अभियान अन्तर्गत हालसम्म रामेछाप जिल्लाका दश हजार चारसय भन्दा बढीले कोरोना भाइरस कोभिड—१९ विरुद्धको खोप लगाएका छन् । गत फागुन २३ गतेदेखी सञ्चालन भएको दोस्रो चरणको खोप अभियान अन्र्तगत विहीबारसम्म जिल्लाका दश हजार ४३२ जनाले खोप लगाएका हुन् ।
गत फागुन २३ गते आइतबारदेखी २७ गते विहीबारसम्म सञ्चालन भएको खोप अभियान अन्तर्गत जिल्लाका ५५ वर्ष माथीका ज्येष्ठ नागरिक र खोप लगाउन छुटेका स्वास्थ्यकर्मी गरी आठ हजार ६०९ जनलाई कोरोना कोरोना विरुद्धको खोप लगाइएको स्वास्थ्य कार्यालय रामेछापका जनस्वास्थ्य अधिकृत भुवन थापाले बताउनुभयो ।
यो अवधिमा जिल्लाको गोकुलगंगा गाउँपालिका, उमाकुण्ड गाउँपालिका, दोरम्बा गाउँपालिका र सुनापति गाउँपालिकाका नागरिकले खोप लगाएका थिए । अहिले जिल्ला सदरमुकाम समेत रहेको मन्थली नगरपालिका , रामेछाप नगरपालिका , खाँडादेवी गाउँपालिका र लिखुतामाकोशी गाउँपालिकाका जेष्ठ नागरिक र यसअघि खोप लगाउन छुटेका स्वास्थ्यकर्मीलाई कोरोना विरुद्धको खोप लगाउने कार्य जारी छ । मन्थली नगरपालिकाको १,५,६, ८,९ नं वडा , रामेछाप नगरपालिका , खाँडादेवी गाउँपालिका र लिखुतामाकोशी गाउँपालिकाको सवै वडाहरुमा ३० वटा खोप केन्द्र मार्फत खोप लगाउने कार्य जारी छ ।
