प्रधानमन्त्री केपी शर्मा ओलीले सरकारको प्रयासले मात्रै कोरोना नियन्त्रण गर्न नसकिने बताउनुभएको छ । प्रधानमन्त्री निवास बालुवाटारमा विज्ञ र विभिन्न राजनीतिक दलका नेताहरूसँगको परामर्श बैठकमा प्रधानमन्त्री ओलीले सङ्कटलाई विरोध गर्ने अवसरका रूपमा नलिन पनि आग्रह गर्नुभयो । प्रधानमन्त्रीले कोभिड नियन्त्रण सरकारले गर्ने कामले मात्र नपुग्ने र जनतामा चेतना बढाउन आवश्यक रहेको बताउनुभयो । कहिले लकडाउन गरेको भनेर विरोध, कहिले लकडाउन किन खोलेको भनेर विरोध गरेको भन्दै प्रधानमन्त्री ओलीले यो महामारी सबैको चुनौती भएको र यसलाइ सबै मिलेर सामना गर्नुपर्ने धारणा राख्नुभयो ।
बालुवाटारमा प्रतिपक्षी दल नेपाली काँग्रेसका सभापति शेरबहादुर देउवा र जनता समाजवादी पार्टीका अध्यक्ष महन्थ ठाकुर सहित जनस्वास्थ्य विज्ञहरुसँग प्रधानमन्त्रीले छलफल गर्नुभएको छ । सरकारले चार महिना लामो लकडाउन अन्त्य गरेदेखि कोरोना भाइरसको सङ्क्रमण र मृत्यु दर वृद्धि भएको छ । राजधानी काठमाडौंमा पनि कोरोना सङ्क्रमण फैलिँदै गएपछि सरकारको आगामी कदमबारे प्रधानमन्त्रीले विज्ञहरु र शीर्ष नेताहरुसँग राय लिन खोज्नुभएको छ । स्वास्थ्य क्षेत्रका विज्ञ र विपक्षी दलका नेताहरुसँगको परामर्शमा प्रधानमन्त्री कार्यालयका सचिव महेन्द्र गुरागाईंले प्रस्तुत गरेको प्रतिवेदनअनुसार हाल प्रतिदिन १८ हजारसम्मको परीक्षण गर्न सक्नेगरी ल्याब स्थापना गरिएको छ भने ४ लाखको पीसीआर टेस्ट भएको छ । स्वास्थ्य मन्त्रालयको तथ्यांकअनुसार नेपालमा २० हजार ७ सय ५० जनामा कोरोना संक्रमण पुष्टि भएको छ भने कोरोनाबाट ५७ जनाको मृत्यु भएको छ ।
