रामेछापको मन्थली नगरपालिकाको जम्मा बजेट खर्च ५५ प्रतिशत मात्रै रहेको छ। नगरपालिकाले चालू आर्थिक वर्ष २०८०/८१ को हालसम्म यति रकम खर्च गरेको जनाएको छ । जम्मा बजेट १ अरब ४ करोड ५४ लाख ९२ हजार रहेकोमा यहि वैशाख २७ गतेसम्म चालू खर्च ६५ प्रतिशत तथा पुँजीगत खर्च ४० प्रतिशत गरि जम्मा ५५ प्रतिशत मात्रै बजेट खर्च गरेको हो ।
नगरपालिकामा संचालित विकास आयोजना तथा कार्यक्रमहरुको प्रभावकारीता तथा सेवा प्रवाहको अवस्था विषयक सार्वजनिक सुनुवाई कार्यक्रममा उक्त कुराको जानकारी गराइएको हो । सार्वजनिक सुनुवाई कार्यक्रममा नगरपालिकाका प्रमुख प्रशासकिय अधिकृत हरि प्रसाद चापागाईले नगरको दोस्रो चौमासिक अबद्यिसम्म भएको कामहरुको बारेमा जानकारी गराउनुभयो ।
उहाँले यहि साउनदेखी हालसम्म नगरपालिका मार्फत संस्थागत विकास तथा सुशासनको क्षेत्रमा भएका कामहरु,आर्थिक विकास,समाजिक विकास,पूर्वाधार विकास आयोजना, विपद व्यवस्थापन र न्यायिक समिति मार्फत भएको प्रगति लगायत विभिन्न क्षेत्रमा भएको प्रगति प्रतिवेदन प्रस्तुत गर्नुभयो ।
सार्वजनिक सुनुवाईमा प्रगति प्रतिवेदन प्रस्तुत पछि कार्यक्रममा सहभागी नागरीकहरुले प्रश्न,जिज्ञासा सहित सुझाव सल्लाह दिएका थिए । नागरीकले शिक्षा,स्वास्थ्य,कृषि,सडक,पशुपालन र खानेपानी क्षेत्रसँग सम्बन्धित प्रश्न गरेका थिए । नागरीकहरुले सोधेको प्रश्नको जवाफ मन्थली नगरपालिकाका प्रमुख लव श्रेष्ठ,प्रमुख प्रशासकिय अधिकृत हरि प्रसाद चापागाइ र सम्बन्धित वडाका वडाअध्यक्षले दिनुभयो ।
वडा नं ९ का वडा अध्यक्ष गोकर्णराज आरणको अध्यक्षता र मन्थली नगरपालिका प्रमुख लव श्रेष्ठको प्रमुख आतिथ्यतामा कार्यक्रम भएको हो । मन्थली नगरपालिका वडा नं ९ पुरानो गाउँमा भएको सार्वजनिक सुनुवाइ कार्यक्रमको सहजीकरण हजुरको रेडियोले गरेको थियो ।
