रामेछापको रामेछाप नगरपालिका–९ टारका आगलागी पीडितलाई रामेछाप युके परिवारले चार लाख बढी रकम सहयोग गरेको छ । यहि चैत्र १ गते भएको आगलागीबाट घर जलेर नष्ट भएका १३ घर परिवारलाई ४ लाख २९ हजार २ सय ५५ रुपैयाँ सहयोग रकम प्रदान गरिएको हो ।
आज(मंगलबार) रामेछाप नगरपालिकाका प्रमुख लबश्री न्यौपाने,वडा नं ८ का वडाअध्यक्ष सन्तोष कुमार तामाङ्ग, रामेछाप युके परिवारका सल्लाहकार होम बहादुर सुनुवार सहितको टोली टार गाउँमै पुगेर पीडितलाई आर्थिक सहयोग हस्तान्तरण गरेको हो । वडा नं ८ का वडाअध्यक्ष सन्तोष कुमार तामाङ्गको विशेष पहलमा उक्त रकम यहाँका आगलागी पीडितलाई प्राप्त भएको हो ।
रामेछाप युके परिवारका अध्यक्ष प्रताप लामाको समन्वयमा युकेमा बसोबास गर्ने ४१ जना नेपालीहरुले उक्त रकम सहयोग गरेका हुन । आगलागी पीडित १३ घर परिवारलाई प्रति परिवार ३३ हजारका दरले उक्त रकम हस्तान्तरण गरिएको छ । आगलागी पीडितलाई रकम हस्तान्तरण गर्दै रामेछाप नगरपालिकाका नगर प्रमुख लबश्री न्यौपानेले सहयोगी मनहरु र रामेछाप युके परिवारलाई धन्यवाद व्यक्त गर्नुभयो ।
धेरै संस्था तथा व्यक्तिहरुले पीडितको घाउमा मलम लगाउने काम गरेको बताउनुभयो । उहाँले अब पीडितको घर बनाउने काममा नगरपालिका लागेको पनि बताउनुभयो । रामेछाप युके परिवारका सल्लाहकार होम बहादुर सुनुवारले विभिन्न विपदहरुबाट पीडित भएकाहरुलाई रामेछाप युके परिवारले सहयोग गर्दै आएको बताउनुभयो ।
