विश्व वित्तीय सप्ताह (ग्लोबल मनि विक)को अवसरमा रामेछाप जिल्लाको पुरानो सदरमुकाम रामेछाप बजारमा आज(शुक्रबार) सचेतनामूलक र्याली गरिएको छ । लघुवित्त कर्मचारी मन्च रामेछापले ‘प्रोटेक्ट युअर मनी, सेक्योर योर फ्युचर’ भन्ने नारा सहित र्याली गरेको हो ।
रामेछाप मानेँ डाँडादेखी सुरु भएको र्याली रामेछाप बजार परिक्रममा गरी रामेछाप नगरपालिकाको अगाडी पुगेर कोणसभामा परिणत भएको थियो । कोणसभामा बोल्दै लघुवित्त कर्मचारी मन्च रामेछापका अध्यक्ष बद्रि सुवेदीले बालबालिका र किशोर किशोरीहरूमा वित्तीय शिक्षाको महत्वबारे जागरण ल्याउने उद्देश्यले विश्व वित्तीय सप्ताह मनाइँदै आएको बताउनुभयो ।
उहाँले लघु वित्तहरु आर्थिक समृद्धिको लागि काम गरिरहेका छन् भन्ने सन्देश दिन सचेतनामूलक र्याली गरिएको पनि बताउनुभयो । जिल्लामा १८ वटा लघुवित्तहरु संचालनमा रहेका छन । यस्तै रामेछाप मन्थलीमा सञ्चालित बैङ्क तथा वित्तीय संस्थाहरूले पनि मन्थली बजारमा र्याली गरेका छन ।
ग्लोबल मनी विक ओईसीडि वित्तीय शिक्षाको लागि अन्तर्राष्ट्रिय सञ्जालले मार्च १८ देखि २४ तारिखसम्म विश्वव्यापी रूपमा विश्व वित्तीय सप्ताह आयोजना गर्ने गरेको छ । सन् २०१२ देखि हरेक वर्ष ग्लोबल मनी विक विश्वभर मनाउने गरिएको छ ।
यस वर्षको ग्लोबल मनी विकको नारा ‘प्रोटेक्ट युअर मनी, सेक्योर योर फ्युचर’ रहेको छ । बालबालिका तथा युवाहरूमा वित्तीय ज्ञान, सीप र अभिवृत्तिका साथै व्यावहारिक रूपमा सक्षम बनाउँदै उनीहरूमा विवेकशील वित्तीय निर्णय लिन अभिप्रेरित गर्ने उद्देश्यमा यो सप्ताह केन्द्रित रहन्छ ।
