न्यूनतम सेवा मापदण्ड पुरा गर्ने देशभरका सरकारी अस्पतालमा जिल्ला अस्पताल रामेछाप तेस्रो हुन सफल भएको छ । देशभरका १५ शैया अस्पतालहरुमध्ये जिल्ला अस्पताल रामेछापले तेस्रो स्थान प्राप्त गरेको हो । जिल्ला अस्पताल बैतडी ९३ प्रतिशत अंक पाएर पहिलो,चौतारा अस्पताल सिन्धुपाल्चोक ९२ प्रतिशत अंक पाएर दोस्रो र जिल्ला अस्पताल रामेछाप ९१ प्रतिशत अंक पाएर तेस्रो हुन सफल भएको हो ।
विभिन्न सूचकका आधारमा मापन गरिँदा जिल्ला अस्पतालले ९१ प्रतिशत अंक पाएको हो । यो विगतको तुलनामा सुधारोन्मुख अंक हो । एक वर्ष अघिको मापन अनुसार ८७ प्रतिशत अंक रहेको अस्पतालले विगतको तुलनामा आफ्नो सेवालाई सुधार गर्दै लगेको छ । अस्पतालले २०७७ मा ६८ प्रतिशत,२०७८ मा ५७ प्रतिशत,२०७९ मा ८७ प्रतिशत र २०८० मा ९१ प्रतिशत अंक पाएको हो ।
स्वास्थ्य निर्देशनालय बाग्मती प्रदेशको आयोजना तथा जिल्ला अस्पताल रामेछापको सहकार्यमा भएको एक कार्यक्रममा उक्त तथ्याङ्क प्रस्तुत गरिएको हो ।
यसको मुल्याङ्कन स्वास्थ्य निर्देशनालयले गर्दछ । अनुगमनको क्रममा अस्पतालको भवन, फोहोर व्यवस्थापन,औषधिको व्यवस्थापन, बिरामी उपचार,सेवा प्रवाह लगायतका सूचकमा अस्पतालले राम्रो अंक पाएको अनुगमन टोलीका संयोजक एवं बकुलर रत्ननगर अस्पताल चितवनका मेडिकल सुपरिटेण्डेन्ट डाक्टर मदन ज्ञावलीले बताउनुभयो । जिल्ला अस्पताल रामेछापले पछिल्लो विगत केही वर्ष यता सेवा प्रवाह र गुणस्तरमा सुधार गरेकै कारण अस्पताल देशभरमै तेस्रो हुन सफल भएको वरिष्ठ हार्डजोर्नी विशेषज्ञ डाक्टर दिपेन्द्र पाण्डेले बताउनुभयो ।
जिल्ला अस्पतालले गरेका कामहरुको बारेमा अस्पतालका निमिक्त मेडिकल सुपरिटेण्डेन्ट डाक्टर केशव श्रेष्ठले जानकारी गराउनुभयो । उहाँले आफुले मेडिकल सुपरिटेण्डेन्टको जिम्मेवारी सम्हालेपछि अस्पतालमा धेरै परिवर्तन आएको बताउनुभयो । उहाँले न्युनतम सेवा मापदण्डमा अझ सुधार गर्दै जाने बताउनुभयो । रामेछाप नगरपालिकाका प्रमुख लबश्री न्यौपानेले जिल्ला अस्पताल रामेछापलाई नगरपालिकाले धेरै सहयोग गरेको बताउनुभयो । आगामी दिनहरुमा पनि सहयोग गर्ने प्रतिबद्धता व्यक्त गर्नुभयो ।
अस्पताल विकास समितिका अध्यक्ष यम पाख्रिनले अस्पतालको विकासका लागी आफु सकृय भएर लागि परेको बताउनुभयो । अहिले अस्पतालमा धेरै सेवाहरु थप भएको भन्दै उहाँले सेवाग्राहीहरुलाई गुणस्तरीय र भरपर्दो सेवा लिन जिल्ला अस्पतालमा आउन आग्रह गर्नुभयो । १५ शैयाको अस्पताल ५० शैयामा स्तरउन्नति भएको र अब छिट्टै कार्यान्वयनमा आउने बताउँदै अध्यक्ष पाख्रिनले अझै विभिन्न सेवा तथा सुविधाहरु थप गर्नका लागी मन्त्रालयमा पहल भैरहेको पनि बताउनुभयो ।
