जिल्ला प्रशासन कार्यालय रामेछापले आफूलाई न्याय दिलाउने विषयमा चासो नदेखाएको भन्दै रामेछापकी विनु यादवले प्रशासनको प्रवेशद्वार अगाडि बीच सडकमा अनसन सुरु गर्नुभएको छ ।
मध्ये रातमा प्रशासनको प्रवेशद्वार अगाडि बीच सडकमा खुल्ला आकाशमुनि अनसन थालेकी रामेछापको मन्थली नगरपालिका वडा नं. १ की २९ वर्षीया विनु यादवले प्रशासनले आफूलाई न्याय दिलाउने विषयमा कुनै चासो नदेखाएको कारण अनसन सुरु गरेको बताउनुभयो ।
आइतबार राति करिब १० बजेको समय एक जना महिला सुरक्षाकर्मीको साथमा बीच सडकमा अनसनरत अवस्थामा भेटिएकी विनुले मन्थली नगरपालिका वडा नं. १ बस्ने प्रदिप कठायत आफ्नो श्रीमान भए पनि जिल्ला अदालत रामेछापले सम्बन्ध विच्छेदको फैसला सुनाएको बताउनुभएको थियो । त्यसपछि विनु उक्त फैसलाको विरुद्धमा रिट लिएर उच्च अदालत पाटन पुग्नुभयो । विनु र प्रदिपबीच जिल्ला अदालतले गरेको सम्बन्ध विच्छेदको फैसलालाई उच्चले बदर गरिदियो ।
उच्च अदालतको फैसलाअनुसार अहिले प्रदिप र विनु पति, पत्नी हुन् । आफू प्रदिपको पत्नी भएको नाताले अहिले घरमा बस्ने व्यवस्था मिलाइदिनु भनी जिल्ला प्रशासन पुग्दा प्रशासनले कुनै चासो नदेखाएको र आलटाल गरेर आफूमाथि अन्यायपूर्ण व्यवहार गरेको उहाँले सुनाउनुभयो ।
उहाँले भन्नुभयो “आज प्रशासन गए, उच्च अदालतको फैसलाअनुसार मलाई मेरो श्रीमान प्रदिप कठायतको घरमा एउटा कोठामा बस्ने व्यवस्था मिलाइदिनु भने तर प्रशासनले सपोर्ट गरेन र सिडिओले सपोर्ट गर्नु भएन, त्यही भएर प्रशासन अगाडि आएर अनसन थालेको हो । सिडिओले गैरजिम्मेवार ढंगले जवाफ दिनुभयो । आफ्नो माग सम्बोधन नभएसम्म अब म अनसन बसिरहन्छु ।”