रामेछाप सदरमुकाम मन्थलीमा हुने ११ दिने वृहत् रामेछाप महोत्सव २०८० को तयारी तिव्र रुपमा भैरहेको छ । महोत्सवको आयोजक रामेछाप उद्योग वाणिज्य सङ्घले बिहीबार(आज) मन्थलीमा पत्रकार सम्मेलन गरी महोत्सवको तयारीका बारेमा जानकारी दिएको हो ।
अहिलेसम्म महोत्सवको लगभग ४० प्रतिशत काम सम्पन्न भैसकेको उद्योग वाणिज्य सङ्घका अध्यक्ष नवीनकुमार थापा मगरले बताउनुभयो । उहाँको अनुसार पौष २६ गतेदेखि माघ ७ गतेसम्म हुने महोत्सवले जिल्लाभर उत्पादन हुने स्थानीय कृषि उत्पादनहरूको प्रवर्धन गरी खस्किँदै गरेको बजारलाई चलायमान बनाउन सहयोग पु¥याउने छ ।
अहिले रामेछाप उद्योग वाणिज्य सङ्घले महोत्सवको तयारीका लागि विभिन्न १५ वटा उपसमितिहरू निर्माण गरी काम गरिरहेको छ । ६८ लाख ५० हजार रुपैयाँ खर्च लाग्ने अनुमान रहेको महोत्सवको ५० हजार भन्दा बढी दर्शकले अवलोकन गर्ने अनुमान गरिएको उद्योग वाणिज्य सङ्घका अध्यक्ष थापा मगरले बताउनुभयो । महोत्सवमा एक सय पचास वटा स्टलहरू रहने छन । यहि पौष २० गतेसम्म स्टलहरू बुकिङ्ग गर्न सकिने छ ।
महोत्सवमा रामेछाप जिल्लास्थित धार्मिक, पर्यटकीय स्थलहरुको अवलोकन गर्दै,तामाकोसी नदीमा व्याफटिङ्को आनन्द लिँदै महोत्सवमा विभिन्न मनोरञ्जनात्मक खेलकुद प्रतियोगिता र बालबालिकाहरुको मनोरञ्जनका लागि बाल उद्यानको व्यवस्था सहित राष्ट्रिय तथा स्थानीय कलाकारहरुद्वारा गायन, नृत्य, हास्यव्याङ्ग्य प्रस्तुती हेर्दै स्थानीय खानाका परिकारहरुको स्वाद लिन सकिने छ ।
महोत्सवमा पालिका स्तरीय लोक दोहोरी प्रतियोगिताका साथै सस्तो अनि सुपथ मुल्यमा स्थानीय स्रोत साधनबाट उत्पादित हस्तकला सामग्री,कषि, घरेलु उत्पादनहरुको सामग्री खरिद गर्न सकिने छ । साथै महोत्सवमा विभिन्न जात जातिहरुको पारम्परिक झाँकी प्रदर्शन र साहित्यिक खुराकहरुको बेजोड प्रस्तुति समेत हेर्न पाईने आयोजक उद्योग वाणिज्य संघले जानकारी दिएको छ ।
“रामेछापको दिगो विकास र अर्थतन्त्रको आधार, कृषि, जलश्रोत र पर्यटन तथा उद्योगको पूर्वाधार, हाम्रो रामेछाप, राम्रो रामेछाप“ भन्ने मूल नाराका साथ महोत्सव हुन लागेको हो ।
