रामेछापमा एक वर्षमा ३० वटा सवारी दुर्घटनामा परी १३ जनाले ज्यान गुमाएका छन । जिल्ला ट्राफिक प्रहरी कार्यालय रामेछापका अनुसार २०७९ साउन १ गतेदेखी २०८० साउन ७ गतेसम्म जिल्लाभर ३० वटा सवारी दुर्घटना भएको हो । यि ३० वटा सवारी दुर्घटनामा परी १३ जनाले ज्यान गुमाएका हुन ।
९४ जना सवारी दुर्घटनामा परी घाईते भएका छन । आर्थिक वर्ष २०७८/७९ को तुलनामा आ/व २०७९/८० मा सवारी दुर्घटनामा भने केही कमी आएको छ । आ/व २०७८/७९ मा ३३ वटा सवारी दुर्घटना हुँदा २२ जनाले ज्यान गुमाएका थिए भने ९८ जना घाइते भएका थिए ।
पछिल्लो समय सवारी दुर्घटना घटेसँगै वार्षिक मृत्यु हुनेको संख्या पनि घट्दै जान थालेको जिल्ला ट्राफिक प्रहरी कार्यालय रामेछापका प्रमुख सहायक निरीक्षक दिपक चौँलागाईले जानकारी दिनुभयो । उहाँका अनुसार दुर्घटना न्यूनीकरणका लागि सवारी जाँचमा कडाइ र कारवाहीको प्रक्रिया अघि बढाएसँंगै दुर्घटना पनि केही कम हुँदै गएको हो ।
पछिल्लो केही वर्ष यताको तथ्याङ्कलाई हेर्ने हो भने रामेछापमा सबैभन्दा बढी दुर्घटना मोटरसाइकल हुने गरेको छ । दुर्घटनाका मुख्य कारणहरुमा ट्राफिक नियम उल्लंघन, मादकपदार्थ सेवन गरी सवारी चलाउने,तीव्र गतिले चलाउने,यान्त्रिक गडवडी,सडकको अवस्था लगायत रहेको उहाँले बताउनुभयो ।
चालकको लापरवाही, क्षमताभन्दा बढी यात्रु बोक्ने प्रवृत्ति र यात्रुको पनि असावधानीजस्ता मानवीय त्रुटि नहुने हो भने सवारी दुर्घटना न्यूनीकरण हुने जिल्ला ट्राफिक प्रहरी प्रमुख चौँलागाईको भनाई छ ।
