न्यूनतम सेवा मापदण्ड पुरा गर्ने सरकारी अस्पतालमा जिल्ला अस्पताल रामेछापले ८७ प्रतिशत अंक पाएको छ । जिल्ला अस्पतालले न्यूनतम सेवा मापदण्ड (minimum service standard ) मा ८७ प्रतिशत अंक पाएको हो । विभिन्न सूचकका आधारमा मापन गरिँदा अस्पतालले ८७ प्रतिशत अंक पाएको हो । यो विगतको तुलनामा सुधारोन्मुख अंक हो ।
एक वर्ष अघिको मापन अनुसार ५७ प्रतिशत,६ महिना अघिको मापन अनुसार ८४ प्रतिशत र अहिले बढेर ८७ प्रतिशत भएको हो । स्वास्थ्य निर्देशनालय बाग्मती प्रदेशको आयोजना तथा जिल्ला अस्पताल रामेछापको सहकार्यमा भएको एक कार्यक्रममा उक्त तथ्याङ्क प्रस्तुत गरिएको हो । यसको मुल्याङ्कन स्वास्थ्य निर्देशनालयले गर्दछ । हरेक ६/६ महिनामा अस्पतालहरुको अनुगमन र मुल्याङ्कन हुँदै आएको छ ।
अनुगमनको क्रममा अस्पतालको भवन, फोहोर व्यवस्थापन,औषधिको व्यवस्थापन, बिरामी उपचार लगायतका सूचकमा अस्पतालले राम्रो अंक पाएको अनुगमन टोलीका संयोजक एवं टोखा अस्पताल काठमाण्डौँका मेडिकल सुपरिटेण्डेन्ट डाक्टर नविन दर्नालले बताउनुभयो ।
जिल्ला अस्पतालले गरेका कामहरुको बारेमा अस्पतालका मेडिकल सुपरिटेण्डेन्ट डाक्टर गगन अधिकारीले जानकारी गराउनुभएको थियो । उहाँले न्युनतम सेवा मापदण्डमा अझ सुधार गर्दै जाने बताउनुभयो ।
रामेछाप नगरपालिकाका प्रमुख लबश्री न्यौपाने र वडा नं ८ का वडाअध्यक्ष सन्तोष तामाङले नगरपालिका क्षेत्र भित्र रहेको जिल्ला अस्पताललाई नगरपालिकाले आवश्यक सहयोग गर्दै आएको र आगामी दिनहरुमा सहयोग गर्ने प्रतिबद्धता व्यक्त गर्नुभयो ।
अस्पताल विकास समितिका अध्यक्ष यम पाख्रिनले अस्पतालको विकासका लागी आफु सकृय भएर लागि परेको बताउनुभयो । अस्पतालमा अझै विभिन्न सेवा तथा सुविधाहरु थप गर्नका लागी मन्त्रालयमा पहल भैरहेको पनि उहाँले बताउनुभयो ।
