बागमती प्रदेशको रामेछाप सहित सबै जिल्लामा पीपीआर खोप अभियान सुरु भएको छ । प्रदेशको १३ वटै जिल्लामा सोमबारदेखि फागुन ७ बजेसम्म पिपिआर खोप अभियान सुरु भएको हो ।
सो अभियान अन्तर्गत बागमती प्रदेशको सबै जिल्लामा गरी ९२ हजार ५ सय ६१ भेडा र २५ लाख २० हजार ६ सय ७१ वटा बाख्रा गरी कुल २६ लाख १३ हजार २ सय ३२ वटा भेडा बाख्रालाई पीपीआर रोगविरुद्ध खोप लगाइने कृषि तथा पशुपन्छी विकास मन्त्रालय बागमतीका प्रवक्ता झलकनाथ कँडेलले जानकारी दिनुभयो ।
प्रदेशका ११९ वटै स्थानीय तहमा भेडा बाख्रामा लाग्ने पीपीआर रोग नियन्त्रण तथा रोकथामका लागि सप्ताहव्यापी खोप अभियान सञ्चालन गर्न लागेको हो । खोप लगाउनका लागि संघीय सरकारबाट प्रदेशभर १२ लाख ६९ हजार खोप उपलब्ध उपलब्ध भएको कृषि मन्त्रालयले जनाएको छ ।
पीपीआर रोगका कारण वर्षेनी धेरै संख्यामा भेडा बाख्राको मृत्यु भइ किसानले ठूलो क्षति बेहोरेकाले बागमती प्रदेशले प्रत्येक वर्ष सप्ताहव्यापी रुपमा खोप अभियान सञ्चालन गर्दै आएको छ । कृषि तथा पशुपन्छी मन्त्रालयले ब्याउने अवस्थाका र रोगी भेडा बाख्रालाई पीपीआर खोप दिन नमिल्ने भएकाले स्वस्थ भेडाबाख्रालाई मात्रै सो खोप दिन आग्रह समेत गरेको छ ।
