रामेछापको सुनापती गाउँपालिकाले पालिका भित्रका विभिन्न विद्यालयमा अध्यन गर्ने गरिब,विपन्न तथा जेहेन्दार विद्यार्थीहरुलाई छात्रवृत्ति वितरण गरेको छ । हिजो पालिकाले एक कार्यक्रमको आयोजना गरि पालिका भित्रका १५ वटा विद्यालयका ७५ जना गरिब,विपन्न तथा जेहेन्दार विद्यार्थीहरुलाई छात्रवृत्ति वितरण गरेको सुनापती गाउँपालिकाका प्रमुख प्रशासकीय अधिकृत कमलराज श्रेष्ठले जानकारी दिनुभयो ।
पालिकाले प्रमुख प्रशासकिय अधिकृतसँग जेहेन्दार छात्रवृत्ति कार्यक्रम अन्तरगत १२ वटा मावि र ३ वटा निमावि गरी १५ वटा विद्यालयका ७५ जना विद्यार्थीहरुलाई छात्रवृत्ति वितरण गरेको प्रमुख प्रशासकीय अधिकृत श्रेष्ठले बताउनुभयो । एउटा विद्यालयबाट ५ जना गरी १५ वटा विद्यालयबाट ७५ जना गरिब,विपन्न तथा जेहेन्दार विद्यार्थीहरु छनोट गरी प्रति व्यक्ति ३ हजारका दरले २ लाख २५ हजार छात्रवृत्ति रकम वितरण गरिएको उहाँले बताउनुभयो ।
यो छात्रवृत्तिले गरिब,विपन्न तथा जेहेन्दार विद्यार्थीहरुलाई थोरै भएपनि कपि,कलम किन्न सहायता मिल्ने प्रमुख प्रशासकीय अधिकृत श्रेष्ठको भनाई छ । गाउँपालिका अध्यक्ष ठूलोकान्छा तामाङ, उपाध्यक्ष गीता विष्ट र प्रमुख प्रशासकीय अधिकृत कमलराज श्रेष्ठले विद्यार्थीहरुलाई छात्रवृत्ति वितरण गर्नुभएको हो ।
