नेपाली काँग्रेसले सत्ता साझेदारमा रहेका गठबन्धनभित्रका दलहरूले एमसीसी पारित गराउन नसघाएको खण्डमा थप सहकार्य गर्न नसकिने निष्कर्ष निकालेको छ । प्रतिनिधिसभामा टेबल भएको एमसीसी सम्झौताको विपक्षमा रहने निर्णय गरेका सत्तारुढ गठबन्धनका दलहरूसँग वास्तममा त्यसो भएको खण्डमा थप सहकार्य नहुने नेपाली काँग्रेसले प्रष्ट पारेको हो ।
प्रधानमन्त्री शेरबहादुर देउवाले पार्टीका शिर्ष नेताहरूसँग आन्तरिक छलफल गर्दै एमसीसीको पक्षमा मत नदिने दलसँग सत्ता सहकार्य हुन नसक्ने बताउनुभएको छ । सत्तारुढ गठबन्धनका ५ दलमध्ये काँग्रेसमात्रै एमसीसी पारित गर्ने पक्षमा उभिएको छ । नेकपा माओवादी केन्द्रले संसदमा टेबल हुनै नदिने, टेबल गरिए सरकार छाड्ने निर्णय संसदीय दलको बैठकबाट गरिसकेको छ ।
तर पनि भित्रभित्रै यसलाइ पारित गर्ने संझौता भएको आरोप माओवादी केन्द्रलाइ लाग्ने गरेको छ । यस्तै, एकीकृत समाजवादीले प्रतिनिधिसभामा अमेरिकी सहयोग परियोजना मिलेनियम च्यालेन्ज कर्पोरेसन एमसीसीको विपक्षमा उभिने निर्णय गरे पनि सांसदहरूलाई ह्विप जारी भने नगर्ने तयारी छ । पार्टीले यसबारेमा विपक्षमा मतदान गर्ने निर्णय गरेको भएपनि सांसदहरूलाइ ह्विप लगाएर बाध्य नपारिने एकीकृत समाजवादीका प्रमुख सचेतक जीवनराम श्रेष्ठले जानकारी दिनुभयो ।
