राष्ट्रिय जनगणनाले पालिकाको जनसंख्या घट्ने गरी जनगणनाको विवरण सार्वजनिक गरेपछि रामेछापको खाँडादेवी गाउँपालिकाले आफैं जनगणना गर्न थालेको छ । गाउँपालिकाले ३ वर्षअघि गरेको गणनाभन्दा कम मात्र हैन, कायम रहेका बालिग मतदाताभन्दा पनि थोरै जनसंख्या रहेको विवरण सार्वजनिक भएपछि खाँडादेवीले सहजकर्ता मार्फत् जनगणना थालेको हो ।
खाँडादेवी गाउँपालिकामा मतदाताको संख्या २२ हजार १ सय ६० रहेको छ । मतदाता नामावलीमा नाम नभएका करिब ६ हजार बालबालिकाहरू विद्यालयमा अध्ययन गर्ने गर्छन् । यस हिसाबमा ९ हजार जनसंख्या छुटेको दाबी अध्यक्ष प्रेम तामाङको छ । राष्ट्रिय जनगणना २०७८ का क्रममा पालिकासँग समन्वय नभएको, कुनै बैठक या जानकारीसमेत नदिएर काम गरेको भन्दै तथ्यांक विभागको भूमिकाप्रति रामेछापका जनप्रतिनिधिहरूले आपत्ति जनाएका छन् ।
