जिल्ला प्रशासन कार्यालय रामेछापले नदी तटीय क्षेत्रमा सावधानी अपनाउन आग्रह गरेको छ । श्रावण ३१ गते आगामी शनिवार माथिल्लो तामाकोशी जलविद्यतु केन्द्रको जलाशय सफा गरिने भएको हुँदा नदी तटीय क्षेत्रमा बासिन्दाहरुलाई सावधानी अपनाउन आग्रह गरिएको हो ।
अपर तामाकोशी हाईड्रोपावर लिमिटेड,माथिल्लो तामाकोशी जलविद्युत केन्द्रबाट जारी भएको सूचना अनुसार साउन ३१ गते शनिवार बिहान ५ बजेदेखि राति ८ बजेसम्म जलाशय सफाई गरिने छ ।
४५६ मेगावाट क्षमताको माथिल्लो तामाकोसी जलविद्युत केन्द्रको जलाशयको सरसफाई गर्दा तामाकोसी नदीको तल्लो तटीय क्षेत्रमा पर्ने रामेछापको खिम्ती सहित सुनकोशी नदीको दोभानभन्दा तलसम्म नदीको पानीको सतह बढ्ने घट्ने भइरहने हुनाले सो अवधिभर माछा मार्ने, नुहाउने, पौडी खेल्ने, लुगा धुने, वस्तुभाउ लैजाने, गिटीबालुवा निकाल्ने, गाडी तार्ने जस्ता कार्यहरू नगर्न र नगराउन प्रशासनले आग्रह गरेको हो ।
साथै, नदी किनारमा परम्परा अनुसार मृतकहरूको दाहसंस्कार वा धार्मिक संस्कार गर्नुपर्दा सतर्कतापूर्वक सावधानीका साथ गर्न गराउन समेत रामेछाप प्रशासनले आग्रह गरेको हो ।
