रामेछापको लिखुतामाको गाउँपालिकामा सञ्चालित “एकीकृत प्रारम्भिक बाल विकास योजना तर्जुमा सम्बन्धी दुई दिने कार्यशाला” सम्पन्न भएको छ ।
चाइल्ड नेटवर्क फाउण्डेशनको आर्थिक तथा सेतो गुराँस राष्ट्रिय बालविकास सेवाको प्राविधिक सहयोगमा लिखुतामाकोशी गाउँपालिकाको आयोजनामा २२ गतेदेखि शुरु भएको कार्यशाला शुक्रबार सम्पन्न भएको हो । लिखुतामाकोशी गाउँपालिकाका अध्यक्ष केशव महतको अध्यक्षतामा “गर्दै गरौँ लगानी बाटो, कुलो, पुल, भवन र मन्दिरमा, थप गरौ लगानी प्रारम्भिक बालविकासमा” र “प्रारम्भिक बालविकासमा लगानी, दिगो राष्ट्र विकासको थालनी ” भन्ने मूल नाराका साथ सञ्चालन गरिएको कार्याशाला दुई दिनसम्म चलेको थियो ।
स्थानीय तहका सरोकारवालाहरूलाई एकीकृत प्रारम्भिक बालविकासको अवधारणाबारे जानकारी दिने, बालबालिकाहरुको सर्वाङ्गीण विकास सुनिश्चित गर्न आवश्यक योजना निर्माणमा स्थानीय तहको भूमिका प्रस्ट पार्ने तथा आगामी आर्थिक वर्षको वार्षिक र आवधिक योजनामा बाल विकास क्षेत्रमा लगानी बढाउन प्रेरित गर्ने लगायतका उद्देश्यले कार्यशाला आयोजना गरिएको सेतो गुराँस राष्ट्रिय बालविकास सेवाका परियोजना संयोजक कर्ण दराईले बताउनुभयो ।
नेपाल सरकार, सङ्घीय मामिला तथा सामान्य प्रशासन मन्त्रालय, अन्य सम्बन्धित मन्त्रालयहरु, यूनिसेफ नेपाल र सेतो गुराँस राष्ट्रिय बाल विकास सेवाको प्राविधिक सहयोगमा निर्मित स्थानीय तहमा एकीकृत प्रारम्भिक बाल विकास योजना तर्जुमा कार्यशाला स्रोत सामग्री २०७५ को आधारमा कार्यशाला सञ्चालन गरिएको उहाँले बताउनुभयो ।
कार्यशालामा प्रारम्भिक बालविकासको अवधारणा, महत्व र बालबालिकाहरुको सर्वाङ्गीण विकासमा सम्बन्धित सरोकारवालाहरुको भूमिका र एकीकृत प्रारम्भिक बालविकास योजना निर्माण र प्रारम्भिक बालविकास राष्ट्रिय रणानीतिकाबारेमा समेत प्रस्तुतीकरण गरिएको थियो ।
कार्यशालामा पालिका अध्यक्ष, उपाध्यक्ष, ७ वटै वडाका वडा अध्यक्ष तथा प्रतिनिध, वडा सचिव, सम्बन्धित शाखाहरु शिक्षा, स्वास्थ्य, खानेपानी, योजना, महिला, बालबालिका तथा समाज कल्याण शाखा लगायतका शाखा प्रमुखहरु, बाल सञ्जालको प्रतिनिधि र सरकारी संस्थाका प्रतिनिधि, इसिडी मेन्टर, बालविकास संयोजकसहित ३९ जनाको सहभागिता रहेको लिखुतामाकोशी गाउँपालिकाकी बालविकास संयोजक कोपिला भुजेलले बताउनुभयो ।
विशिष्ट व्यक्तिहरुको उपस्थितिमा भएको यो कार्यशालालाई स्थानीय तहमा प्रारम्भिक बाल विकासको विषयलाई नीतिगत रूपमा स्थापित गर्न महत्वपूर्ण कदमको रूपमा हेरिएको उहाँको भनाई छ ।
स्थानीय तहमा एकीकृत योजना तर्जुमा गर्नेबारे जनप्रतिनिधि र शाखा प्रमुखहरुको साझा प्रतिबद्धता
स्थानीय तहमा एकीकृत योजना तर्जुमा गरी कार्यान्वयन गर्ने विषयमा जनप्रतिनिधि र सम्बन्धित शाखा प्रमुखहरुले साझा प्रतिबद्धता जाहेर गरेका छन् । गाउँपालिका अध्यक्ष, उपाध्यक्ष, वडा अध्यक्ष, शाखा प्रमुख, वडा सचिव र अन्य सहभागीहरुले समेत गर्भावस्था देखि ८ वर्षसम्मका सबै बालबालिकाको सर्वोत्तम हित र सर्वाङ्गीण विकासको अधिकार सुनिश्चित गर्न स्थानीय सरकार, सेवा प्रदायक संस्था, विद्यालय, अभिभावक, शिक्षा, स्वास्थ्य, सञ्चार र नागरिक समाजसँग समन्वय गरी सक्रिय भूमिका निर्वाह गर्ने प्रतिबद्धता जनाएका हुन् ।
यसैगरी समापन सत्रमा बोल्दै गाउँपालिका अध्यक्ष केशव महतले आगामी दिनमा प्रारम्भिक बालविकासका क्षेत्रमा एकीकृत योजना निर्माण गरि कार्यान्वयन गर्ने प्रतिबद्धता जनाउनुभयो । यसैगरी, उपाध्यक्ष दिपा पाख्रिनले पनि सेतो गुराँसले गरेको कार्यक्रमको प्रशंसा गर्दै यस कार्यक्रमलाई सफल बनाउने कुरामा पालिकाकोतर्फबाट पूर्ण सहयोग रहने बताउनुभयो ।
अध्यक्ष महतको अध्यक्षतामा पहिलो पटक स्थानीय प्रारम्भिक बालविकास समिति गठन
गाउँपालिका अध्यक्ष केशव महतको अध्यक्षतामा पहिलो पटक ८ सदस्यीय प्रारम्भिक बालविकास समिति गठन भएको छ । अध्यक्ष महतको अध्यक्षतामा गठन भएको समितिको सदस्यमा उपाध्यक्ष दिपा पाख्रिन, कार्यपालिका सदस्य इन्द्रमाया श्रेष्ठ, शिक्षा, युवा खेलकूद शाखा प्रमुख जयकृष्ण चौलागाई, स्वास्थ्य शाखा प्रमुख किशोरी प्रसाद र कमला बस्नेत हुनुहुन्छ ।
समितिको सदस्य-सचिवमा प्रमुख प्रशासकीय अधिकृत रामसिंह डँडाल रहनु भएको छ । समितिले शिक्षा, स्वास्थ्य, पोषण, सरसफाइ, कृषि र पशुपालन जस्ता क्षेत्रलाई एकीकृत गर्दै प्रारम्भिक बाल विकास कार्यक्रमको लागि आवश्यक प्राविधिक सहायोग तथा अनुगमन गर्ने छ । कार्यशाला गाउँपालिका नजिकैको विद्यालय भवनको हलमा भएको थियो ।
