डेँगी रोग सम्बन्धि सचेतना तथा खोज र नष्ट गर अभियान सहित रामेछाप बजार सरसफाई कार्यक्रम गरिएको छ । जनस्वास्थ्य कार्यालय रामेछाप र रामेछाप नगरपालिकाको कार्यालयको आयोजनामा कार्यक्रम भएको हो ।
सहिद स्मृति चोक देखि माथिल्लो बजार,तल्लो बजार हुँदै मानेँडाँडासम्म बजार सरसफाई गरिएको हो । नियमितरूपमा पानी परेसँगै लामखुट्टेको टोकाइबाट हुने डेङ्गु रोग फैलन सक्ने भन्दै लार्भा खोज र नष्ट गर अभियानसँगै बजार सरसफाई गरिएको रामेछाप नगरपालिकाका जनस्वास्थ्य अधिकृत विष्णु बहादुर कार्कीले बताउनुभयो ।
डेङ्गीबाट बच्ने सन्देश बजाउँदै जनप्रतिनिधी,कर्मचारी,स्वास्थ्यकर्मी,सेना,प्रहरी सहित स्थानियहरुको सहभागीतामा सरसफाई गरिएको हो । बजार क्षेत्रमा पानी जमेको स्थानमा कुचो वा अन्य साधनको प्रयोग गरी पानी हटाउने,टायरलगायत सडक किनारामा राखिएको वस्तुमा जमेको पानी फाल्ने,झाडीहरु फाँड्ने,सडकको फोहोर संकलन गर्ने जस्ता कार्य गरिएको हो ।
डेँगी रोगबाट बच्न मुख्यतया लामखुट्टेको टोकाइबाट बच्नु रहेको स्वास्थ्य कार्यालय रामेछापका प्रमुख बिभु कुमार झा ले बताउनुभयो । यसका लागि लामखुट्टे बस्ने स्थान जस्तै गमला, फूलदानी, खाली बट्टा, खाली ड्रम, गाडीका काम नलाग्ने टायरमा पानी जम्न नदिन उहाँले नागरीकलाई आग्रह गर्नुभयो ।
