रामेछापको रामेछाप नगरपालिकामा प्रारम्भिक बालविकास सम्बन्धी १ दिने अभिमुखीकरण कार्यक्रम संचालन भइरहेको छ । “इसिडी हार्मोनी परियोजना” अन्तर्गत चाइल्ड एड नेटवर्क फाउण्डेशनको सहयोगमा रामेछाप नगरपालिकासँगको सहकार्यमा सेता गुराँस राष्ट्रिय बालविकास सेवाले आयोजना गरेको एक दिने अभिमुखीकरण कार्यक्रम मंगलबार नगरपालिकाको सभा हलमा सम्पन्न भएको हो ।
वडा नं ४,८ र ७ मा रहेको विद्यालयका प्र.अ. वि.व्य.स. र शिक्षक अभिभावक संघका अध्यक्षका लागि प्रारम्भिक बालविकास सम्बन्धी १ दिने अभिमुखीकरण कार्यक्रम आयोजना गरिएको हो ।
कार्यक्रममा प्रधानाध्यापक, विद्यालय व्यवस्थापन समितिका अध्यक्ष, अभिभावक संघका अध्यक्ष सहित प्रत्येक विद्यालयबाट तीन÷तीन जनाको सहभागिता रहेको थियो । नीतिगत व्यवस्था, पाठ्यक्रम, प्रारम्भिक बालविकासको अवधारणा, बालविकास केन्द्र सञ्चालनका न्यूनतम मापदण्ड र बालमैत्री सिकाइ लगायतका विषयमा अभिमुखीकरण गरिएको थियो ।
प्रारम्भिक बालविकास केन्द्र सञ्चालन तथा व्यवस्थापनका सन्दर्भमा बनेका नीतिगत व्यवस्था, पाठ्यक्रम, प्रारम्भिक बालविकासको अवधारणाबारे जानकारी गराउँदै केन्द्र व्यवस्थापन तथा सञ्चालनमा शिक्षक, अभिभावक र व्यवस्थापकीय सहित त्रिपक्षीय बुझाइमा एक रुपता ल्याउने उद्देश्यले यो कार्यक्रम सञ्चालन गरिएको बताइएको छ ।
कार्यक्रममा परियोजना संयोजक मैया वस्नेत र रामेछाप नगरपालिकाको बाल विकास संयोजक सरोज श्रेष्ठले प्रारम्भिक बाल विकास, बाल विकास केन्द्र सञ्चालन र व्यवस्थापन सम्बन्धी नीतिगत व्यवस्था, मापदण्ड, पाठ्यक्रम, बालमैत्री सिकाई, मूल्यांकन लगायतका विषयवस्तु प्रस्तुत गर्नु भएको थियो । सोही प्रकारको अभिमुखीकरण कार्यक्रम बुधबार वडा नं ६ मा संचालन हुदैछ ।
