नेपाल कम्युनिष्ट पार्टीका संस्थापक महासचिव पुष्पलाल श्रेष्ठको जन्मस्थान रामेछापको भंगेरीमा बनाउन सुरु गरिएको पुष्पलाल पार्क अलपत्र परेको छ । २ वर्ष अघि नै निर्माण सम्पन्न हुनुपर्ने पार्क निर्माणको काम अलपत्र परेको हो ।
नेपाली कम्युनिष्ट आन्दोलनका अगुवा पुष्पलालको जन्मस्थान भंगरीका १७ परिवारको करिब ५५ रोपनी जग्गा सरकारले अधिग्रहण गरी पुष्पलाल पार्क बनाउने काम थालेको थियो । तर काम अलपत्र पर्दा पार्कका लागि जग्गा दिएका स्थानीय बासिन्दा पनि आक्रोशित छन् ।
२०७६ सालमा ५५ करोड रुपैयाँको लागतमा पार्क निर्माणको काम थालिए पनि सम्पन्न नहुँदा बनेका संरचना पनि भत्किन थालेका छन् । पार्कको घेराबार,सेमिनार हल,पुस्तकालय भवन र आवासीय भवन निर्माण भइसके पनि त्यसको जिम्मेवारी कसैले नलिँदा अलपत्र अवस्थामा छ ।
भंग्ेरीमा अहिले पुष्पलाल र उहाँका दाजु गंगालाल श्रेष्ठको अर्धकदको शालिक छ । पार्क निर्माणको लागी अधिग्रहण गरिएको ५५ रोपनी जग्गा मध्ये ५० रोपनी माधवकुमार नेपाल अध्यक्ष रहेको पुष्पलाल प्रतिष्ठानको नाममा र ५ रोपनी नेपाल सरकार भवन तथा सहरी विकास विभागको नाममा छ ।
पार्कको जिम्मेवारी कस्ले लिने भन्ने अन्यौल रहेको रामेछाप नगरपालिकाका मेयर लबश्री न्यौपानेले बताउनुभयो । गत २ आर्थिक वर्षमा प्राप्त बजेटबाट पार्क भित्रको संरचना निर्माण गरेको तर चालू आर्थिक वर्षका लागी बजेट विनियोजन नभएकाले काम नभएको सघन सहरी तथा भवन निर्माण आयोजनाका सूचना अधिकारी शिवराज महर्जनको भनाइ छ ।
पार्क निर्माण भए भंगेरी क्षेत्रको पर्यटन प्रवद्र्धनमा सहयोग पुग्ने आशा स्थानीय बासिन्दाको छ । तर पार्क निर्माणको काम अघि नबढ्दा स्थानीयबासिन्दाको यो आशा निराशामा परिणत हुँदै गएको छ ।
