रामेछापमा भाँडा चोर्ने र चोरी गरेको भाँडा किन्ने पक्राउ परेका छन । जिल्ला प्रहरी कार्यालय रामेछापले यही वैशाख १ गते मन्थली स्थित खाँदबारीमा टिकाबहादुर मगरको घरमा चोरी गर्ने युवकलाई पक्राउ गरेको हो ।
मन्थली नगरपालिका वडा नं १ कै रामबहादुर कार्कीले मगरको घरको ढोकाको ताल्चा फुटाई विभिन्न भाँडाहरु चारी गरेका थिए । उनलाई वैशाख १४ गते पक्राउ गरिएको जिल्ला प्रहरी कार्यालय रामेछापका प्रहरी निरीक्षक एवं प्रवक्ता रञ्जन गिरीले जानकारी दिनुभयो ।
पक्राउ परेका कार्कीले मगरको घरबाट २ थान तामा पितलको गाग्री, २ थान चरेसको झर्का थाल, २ थान ढलौटको अम्खरा र अन्य भाँडा चोरी गरेर सिन्धुली खुर्कोट स्थित पर्सा वीरगन्ज महानगरपालिका वडा नं २२ मतियारी बस्ने श्यामबाबु सोनारलाई बिक्री गरेको अनुसन्धानबाट खुलेको छ ।
चोरीका सामान खरिद गर्ने श्यामबाबुलाई पनि यही २४ गते चोरीको सामान सहित पक्राउ गरी आवश्यक अनुसन्धान कार्य भइरहेको जिल्ला प्रहरी कार्यालय रामेछापले जानकारी दिएको हो ।
