रामेछापको रामेछाप नगरपालिकाले नगरभित्र रहेका छाडा कुकुरलाई नियन्त्रण गर्न बन्ध्याकरण गर्न सुरु गरेको छ । छाडा कुकुरको संख्या बढेपछि नगरपालिकाले बन्ध्याकरण गर्न शिविर नै सञ्चालन गरेको हो । नगरपालिकाले नेपाल एनिमल वेलफेयर एण्ड रिसर्च सेन्टर बनेपा काभ्रेसँगको प्राविधिक सहयोगमा बिहिबार(आज)देखि ५ दिने शिविर सञ्चालन गरेको नगरपालिकाका पशुपन्छी विकास शाखा प्रमुख काजी शेर्पाले बताउनुभयो ।
यो शिविर २० गतेसम्म संचालन हुनेछ । शिविरमा घर पालुवा तथा नगरपालिकाको बजार क्षेत्रहरुमा छाडा रुपमा रहेका कुकुरलाई नियन्त्रणमा लिएर बन्ध्याकरण गरिने छ । सामुदायिक कुकुरको संख्यामा कमी ल्याउन र रेबिजको प्रकोप न्यूनीकरण गर्न सामुदायिक कुकुरको बन्ध्याकरणका लागि शिविर सञ्चालन गरिएको हो । शिविरमा कुकुरलाई लुत्तो र रेविज रोग विरुद्धको खोप पनि लगाइने पशुपन्छी विकास शाखा प्रमुख शेर्पाले बताउनुभयो ।
बजार क्षेत्र आसपासबाट कुकुरलाई नियन्त्रणमा लिई शिविरस्थलमा ल्याई बन्ध्याकरण र उपचार गरेपश्चात् नियन्त्रणमा लिएकै स्थानमा लगेर छाड्ने उहाँले बताउनुभयो । घर पालुवा कुकुर बन्ध्याकरण गर्न शिविरमा ल्याउन उहाँले नगरवासिलाई आग्रह गर्नुभयो । यो पटक एक सय कुकुरलाई बन्ध्याकरण गर्ने लक्ष्य रहेको उहाँले बताउनुभयो । केही समय अघि रामेछाप बजारमा छाडा कुकुरले आतंक मच्चाएको थियो ।
कुकुरले बाटो हिँडिरहेका मानिसहरुलाई टोक्ने,झम्टने गरेको थियो । छाडा कुकुरको समुहले खसी बाख्रा र बंगुरलाई टोकेर समेत मारेको थियो । नागरीकहरुले छाडा कुकुर नियन्त्रण गर्न नगरपालिकालाई ध्यानाकर्षण पत्र समेत बुझाएका थिए । अब भने बन्ध्याकरण शिविर पश्चात छाडा कुकुर नियन्त्रण हुने अपेक्षा गरिएको छ ।
