डिभिजन वन कार्यालय रामेछापमा लामो समयदेखी दरवन्दी अनुसारका कर्मचारीको पदपूर्ति हुन नसक्दा कार्यालयले सम्पादन गर्ने दैनिक कामहरु प्रभावित हुँदै आएको छ । कार्यालयमा अधिकृत छैँठौँ,लेखाअधिकृत,रेन्जर,फरेस्टर,वन रक्षक लगायतका कर्मचारीहरुको अभाव रहेको छ ।
४३ जनाको दरवन्दी भएको डिभिजन वन कार्यालयमा हाल २२ जना कर्मचारी मात्र कार्यरत रहेका छन् । डिभिजन वन कार्यालय माताहतका जिल्लाका ६ वटा सव–डिभिजन कार्यालयले कर्मचारी अभावका कारण सोचे अनुसार काम गर्न नसकेको डिभिजन वन कार्यालय रामेछापका प्रमुख रामकृष्ण केसीले बताउनुभयो ।
कर्मचारी नभएकाले भएका कर्मचारीहरुलाई आलोपालो प्रणाली मार्फत काममा खटाउँदै आएको उहाँको भनाई छ । कर्मचारी अभाव हुँदा सव–डिभिजन कार्यालय हिमगंगा, चिसापानी, धोबी, दोरम्वा, खाँडादेवी र ठोसेको काम समेत प्रभावित हुँदै आएको छ । कर्मचारी अभावको विषयमा पटकपटक प्रदेश सरकारलाई पत्राचार गर्दा समेत अहिलेसम्म कर्मचारी नपठाएको डिभिजन वन कार्यालय रामेछापका प्रमुख केसीले बताउनुभयो ।
