हालै सम्पन्न नेपाली कांग्रेस रामेछाप जिल्ला अधिवेशनको मतगणनामा धाँधली भएको भन्दै कांग्रेस रामेछापका नेताहरुले केन्द्रीय निर्वाचन समितिसमक्ष पुनःमतगणनाको माग गरेका छन् ।
जिल्ला अधिवेशनका क्रममा महाधिवेशन प्रतिनिधिको मतपेटिकामा जिल्ला समितिका पदाधिकारीको मत भेटिएको, जिल्ला कार्यसमितिका पदाधिकारीहरु र सदस्यको मतपेटिकामा महाधिवेशन प्रतिनिधिका ४९ मत भेटिएकोले हँुदा पुनः मतगणनाको मागसहित मंगलबार केन्द्रीय समितिमा निवेदन परेको हो ।
जिल्ला उपसभापति पदका उम्मेदवार बेदराज लामा, महाधिवेशन प्रतिनिधिका उम्मेदवार गजेन्द्रबहादुर कार्की, झनक श्रेष्ठ, सिर्जना खड्का, सुमित्रा मोक्तान र डा. सुमन कर्माचार्यले निवेदन दिनुभएको छ ।
निवेदनमा उम्मेदवारहरुलाई मतगणनाको आचारसंहिताबारे जानकारी नदिएको, मतगणनास्थलमा पस्न नदिएको, सीमित उम्मेदवारको दबाबमा मत गनिएकोले जित्ने उम्मेदवार हार्ने र हार्नेले जित्ने सम्भावना भएकाले केन्द्रीय समितिमा झिकाएर पुनः मतगणना गर्न माग गरेको निवेदकमध्येका झनकबहादुर श्रेष्ठले बताउनुभयो ।
हिमाली जिल्ला रामेछापमा गएको असोज २६ गते जिल्ला कार्यसमिति र महाधिवेशन प्रतिनिधिका लागि मतदान भएको थियो ।
