रामेछापमा आज थप ३७ जना कोरोनामुक्त भएका छन् भने पाँच जना सङक्रमित थपिएका छन् । होम आइसोलेसनमा रहेका ३६ जना र संस्थागत आइसोलेसनमा रहेका एक जना कोरोनामुक्त भएको स्वास्थ्य कार्यालय रामेछापले जनाएको छ ।
योसँगै कोरोनामुक्त हुनेको कुल सङ्ख्या १११ पुगेको छ । स्वास्थ्य कार्यालय रामेछापका अनुसार आइतबार गोकुलगङ्गा गाउँपालिकाका दुई जनाको पीसिआर रिपोर्ट र जिल्ला अस्पताल रामेछापका तीन जनाको एन्टिजेन रिपोर्ट पोजेटिभ आएको छ ।
स्वास्थ्य कार्यालय रामेछापका जनस्वाथ्य अधिकृत भुवन थापाका अनुसार वैशाखदेखि हालसम्मको अवधिमा ३४० जनामा कोरोना पुष्टि भएको छ । तीमध्ये अहिले १९२ जना सक्रीय सङ्क्रमित होम आइसोलेसनमा रहेका छन भने तीस जना संस्थागत आइसोलेसनमा रहेका छन् ।
कोरोना सङ्क्रमित दुई जनाको मृत्यु भइसकेको छ । यस्तै पाँच जनालाई रिफर गरिएको जनस्वास्थ्य अधिकृत थापाले बताउनुभयो । उहाँका अनुसार अब एकसय जनाको पीसिआर रिपोर्ट र पाँचजनाको एन्टिजेन्ट परीक्षण रिपोर्ट आउन बाँकी छ ।
