रामेछापमा विहीबार पाँच जना पत्रकारसहित थप २९ जनामा कोरोना सङ्क्रमण पुष्टि भएको छ । यो सङ्गै जिल्लामा कोरोनाका सक्रिय सङ्क्रमितको सङ्ख्या ७६ जना पुगेको छ ।
वैशाख २१ गते मङ्गलबार प्राथमिक स्वास्थ्य केन्द्र मन्थलीमा स्वाब सङ्कलन गरी कोरोना परीक्षणका लागि पठाइएको ३८ जनाको स्वाबमध्येबाट २६ जना र जिल्ला अस्पताल रामेछापबाट तीनजनाको स्वाब पठाइएकोमा तीनैजनामा कोरोना पोजेटिभ देखिएको स्वास्थ्य कार्यालय रामेछापले जनाएको छ ।
स्वास्थ्य कार्यालयका जनस्वास्थ्य अधिकृत भुवन थापाका अनुसार पाँचजना पत्रकारसहित २९ जनामा कोरोना सङ्क्रमण पुष्टि भएको हो । यसअघि रामेछापका अर्का एक पत्रकारमा पनि कोरोना संक्रमण देखिएको थियो ।
थपिएका २९ जनासहित विहीबारसम्म जिल्लामा कुल कोरोना सङ्क्रमितको सङ्ख्या ३०२ जना पुगेको छ । यसमध्ये २२६ जना निको भएर डिस्चार्ज भइसकेका छन् ।
