किसानका लागि पशुधनको सुरक्षाको दृष्टीले राम्रो मानिने पशु बीमा कार्यक्रम पछिल्लो समय रामेछाप जिल्लाको रामेछाप नगरपालिकामा प्रभावकारी बन्दै गएको छ । रामेछाप नगरपालिकाले एक घर एक पशु बीमा कार्यक्रम सन्चालन गरेको छ । साेिह कार्यक्रम अन्तर्गत नगरका सबै वडाहरुमा पशु बीमा कार्यक्रम लागु हुनेछ । ९ वटा वडाहरु रहेको नगरपालिकाका ५ वडा वडाहरुमा एक घर एक पशु बीमा कार्यक्रम सन्चालन भईसकेको छ भने अब बाँकी रहेका ४ वटा वडाहरुमा पनि कार्यक्रम सन्चालन गरिनेछ । एक घर एक पशु बीमा कार्यक्रम मार्फत पशुको बीमा गराएका २४ जना कृषकले आफ्नो क्षती भएको पशुको बीमा गराए वापतको रकम प्राप्त गरेका छन । रामेछाप नगरपालिकाका प्रमुख नर बहादुर थापा मगरले आज कृषकहरुलाई बीमा वापतको रकम प्रदान गर्नुभएको छ । वडा नम्बर ७ का ४ जना,वडा नम्बर ८ का १३ जना र वडा नम्बर ९ का ७ जना कृषकहरुलाई विमा रकम बराबरको चेक हस्तान्तरण गरिएको छ । नगरपालिकाका किसानहरुलाई फाईदा पुग्ने गरी नगरपालिकाले एक घर एक पशु बीमा कार्यक्रम अभियानकै रुपमा सन्चालन गरेको नगर प्रमुख थापा मगरले बताउनुभयो । साथै नगरपालिकाले नगरभरीका ४० हजार नागरीकहरुकै स्वास्थ्य बीमा गर्ने लक्ष्य लिएको उहाँले बताउनुभयो ।
