बडा दशैंको सातौँ दिन, आश्विन शुक्ल सप्तमीका अवसरमा आज देशभरका विभिन्न शक्तिपीठहरूमा फूलपाती भित्र्याउने दिन, नोबेल कोरोना भाइरसको महामारीका कारण विशेष सावधानी पु¥याएर विधि पु¥याइँदै छ । राष्ट्रपति विद्यादेवी भण्डारी प्रमुख अतिथिका रुपमा सरिक हुने यसवर्षको फूलपाती बढाइँ कार्यक्रम धर्म, संस्कृति र परम्परालाई निरन्तरता दिने उद्देश्यले सांकेतिकरूपमा मात्र आयोजना गरिने नेपाली सेनाले जनाएको छ ।
अघिल्ला वर्ष सेनाले भव्य समारोह आयोजना गरी फूलपाती बढाइँ हर्षोल्लासका साथ मनाउँदै आएको थियो । कोभिड १९ को सङ्क्रमणबाट उत्पन्न परिस्थितिका कारण संस्कृति र परम्परालाई जीवन्तता दिन प्रतिकात्मकरूपमा मात्र यस वर्षको फूलपाती बढाइँ आयोजना गरिने सैनिक प्रवक्ता सन्तोषबल्लभ पौडेलले जानकारी दिनुभयो ।
उहाँका अनुसार यस वर्षको बढाइँमा थोरै कार्यक्रम सामेल गरिएका छ । कार्यक्रम करिब आधा घण्टाको मात्रै हुने उहाँले बताउनुभयो । कोभिड १९ को जोखिमका कारण पाहुनाको सङ्ख्या कटौती गरी एक सय जनामा सीमित गरिएको सेनाले जनाएको छ । आजको दिन कालरात्री भगवतीको पूजा गरिन्छ । देविको उपासनाबाट कालबाट छुट्कारा पाउनुका साथै कष्ट नाश हुने, बाधा अड्चन नआउने विश्वास गरिन्छ ।
घटस्थापनाका दिनदेखि वैदिक विधिपूर्वक दुर्गालाई आह्वान गरी पूजाआजा गरिएको दशैंघर अथवा पूजाकोठामा शुभसाइतको प्रतिकका रूपमा उखु, बेसार, केराको बोट, धानको बाला, बेलपत्र, जयन्ती, अशोकको फूल र अन्य नयाँ पालुवासमेत भित्र्याइन्छ । नौ पातमा क्रमशः ब्रहृमायणी, रक्तदन्तिका, लक्ष्मी, दुर्गा, चामुण्डा, कालिका, शिवा, शोकहारिणी र कात्तिकी देवीलाई आह्वान गरेर पूजा पनि गरिन्छ ।
