नेपालमा पछिल्लो २४ घण्टामा २२५३ जनामा कोरोना भाइरसको संक्रमण पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले पछिल्लो २४ घण्टामा थप २२५३ जनामा कोरोना संक्रमण पुष्टि जानकारी दिनुभयो । योसहित नेपालमा कोरोना संक्रमितको जम्मा संख्या ८६ हजार ८२३ पुगेको छ । पछिल्लो २४ घण्टामा १३२९ जना कोरोना संक्रमित निको भई डिस्चार्ज भएका छन् । योसहित नेपालमा कोरोनामुक्त भई डिस्चार्ज हुनेको संख्या ६४ हजार ६७ पुगेको छ ।
स्वास्थ्य मन्त्रालयका अनुसार पछिल्लो २४ घण्टामा १२ हजार ७८४ जनाको पीसीआर परीक्षण गरिएको छ । अहिले संक्रीय संक्रमितको संखया २२ हजार २१९ रहेको छ । पछिल्लो २४ घण्टामा काठमाडौं उपत्यकामा १५९९ जनामा कोरोना संक्रमण पुष्टि भएको छ । संक्रमित मध्य काठमाडौंमा १३७३, ललितपुरमा १८७ र भक्तपुरमा ३९ जनाका संक्रमण पुष्टि भएको छ । पछिल्लो २४ घण्टामा ५ दिनको बालिकासहित ७ जनाको कोरोना संक्रमणबाट मृत्यु भएको छ ।
मृत्यु भएकामध्ये ४ जना पुरुष र ३ जना महिला छन् । स्वास्थ्य मन्त्रालयका अनुसार मकवानपुरमा पाँच दिने बालिकाको पनि ज्यान गएको छ । यसैगरी बाँकेमा दुई जना तथा चितवन, काठमाडौं, ललितपुर र कञ्चनपुरमा एक एक जनाको मृत्यु भएको छ । यो सहित नेपालमा कोरोना भाइरसबाट मृत्यु हुनेको संख्या ५३५ पुगेको स्वास्थ्य मन्त्रालयले जनाएको छ ।
