कोरोना सङक्रमण तीब्र गतिमा फैलिन थालेपछि जिल्ला प्रशासन कार्यालय रामेछापले गएराति १२ बजेदेखि लागू हुने गरी जिल्लामा निषेधाज्ञा लागू गरेको छ । रामेछापका प्रमुख जिल्ला अधिकरी रुद्रादेवी शर्माले कोरोना रोकथाम तथा नियन्त्रणलाई थप प्रभावकारी बनाउन भदौ ४ गते राति १२ बजेदेखि अर्को आदेश जारी नभएसम्म रामेछाप जिल्लाभर लागू हुने गरी निषेधाज्ञा जारी गरिएको बताउनुभयो । जिल्लामा निषेधाज्ञा जारी भएसँगै बजारक्षेत्रहरुमा कडाई गरिएको छ । मानिसहरुको आवातजावत र सवारी आवागमनमा समेत विहानैदेखि कडाई गरिएको जिल्ला प्रहरी कार्यालय रामेछापले जनाएको छ । प्रहरी नायब उपरीक्षक वशन्त पाठकका अनुसार विहानैदेखि जिल्लाका मुख्य नाकाहरु र बजार क्षेत्रमा प्रवेश गर्ने चोकहरुमा प्रहरी परिचालन गरीएको छ । सडकमा गुड्ने सवारी साधन र अत्यावश्यक काममा पैदल हिँड्नेसँग पनि प्रहरीले सोधपुछ गरेर मात्र छाड्ने गरेका छन् । ठाउँठाउँमा प्रहरीले माइकिङ गर्दै निषेधाज्ञाको पालना गर्न अपिल समेत गरिरहेको छ ।
रामेछापमा आजदेखि निषेधाज्ञा जारी,नाकाहरुमा प्रहरी परिचालन
