रामेछापको रामेछाप नगरपालिकाले चालु आर्थिक वर्षको हालसम्म जम्मा बजेटको १४.३८ प्रतिशत मात्रै रकम खर्च गरेको छ । नगरपालिकाले चालु आर्थिक वर्षको साउनदेखि कात्तिक महिनासम्म जम्मा बजेट ७६ करोड ८८ लाख ६९ हजार ५ सय ५१ रहेकोमा ११ करोड ५ लाख ९० हजार ५ सय ७३ रुपैयाँ ९४ पैसा अर्थात १४.३८ प्रतिशत मात्रै रकम खर्च गरेको हो ।
यो अवधिसम्म चालु तर्फ ५१ करोड ३७ लाख ३ हजार ७ सय २३ रुपैया बजेट रहेकोमा १० करोड ६६ लाख ८२ हजार ७८ रुपैया ९४ पैसा अर्थात २०.७७ प्रतिशत बजेट खर्च भएको छ । पुँजीगत तर्फ २५ करोड ५१ लाख ६५ हजार ८ सय २८ रुपैया बजेट रहेकोमा ३९ लाख ८ हजार ४ सय ९५ अर्थात १.५३ प्रतिशत बजेट खर्च भएको हो ।
रामेछाप नगरपालिकाका योजना शाखाका अधिकृत नारायण कुमार कार्कीका अनुसार साना ठुलागरी १ सय ४ वटा योजनाहरु रहेकोमा २ वटा योजनाको मात्रै सम्झौता भएको छ । रामेछाप नगरपालिकामा पुँजीगत खर्च कम हुँदा विकास निर्माणका कामहरु ठप्प देखिएको छ । असार लागेपछि बजेट सक्काउने प्रबृत्ति यो पटक पनि दोहोरिने भएको हो ।
