रामेछाप जिल्ला २०७५ साल जेठ २८ गते बाग्मती प्रदेशको सातौँ जिल्लाका रूपमा खुल्ला दिसामुक्त घोषणा भएको थियो । तर व्यवहारमा भने कार्यान्वयनमा आउन सकेको छैन ।
मानिसहरुको भीडभाड हुने स्थानमा सार्बजनिक शौचालय बनेका छैनन् भने, सरकारी कार्यालयमा भएका शौचालय समेत व्यवस्थित र सफा नभएको स्थानीय अस्मिता महताराको भनाइ छ । जिल्ला खुला दिसामुक्त घोषणा भएको ६ वर्ष बिते पनि पूर्ण कार्यान्वयन भएको छैन ।
रामेछापको ८ स्थानीय तहमध्ये मन्थली र रामेछाप नगरपालिकाले मात्रै बजारमा सार्वजनिक शौचालय निर्माण गरेका छन । तर सवारी साधन आवतजावत गर्ने कुनै पनि सडकमा कुनै पनि स्थानिय तहहरुले शौचालय निर्माण गरेका छैनन ।
मानिसको भिडभाड र आवतजावत हुने अन्य क्षेत्रमा सार्वजनिक शौचालय आवश्यक भए पनि बनाउनेतर्फ कसैको ध्यान नपुगेको नविन गाउँलेले बताउनुभयो । खुला दिसामुक्त क्षेत्र घोषणा गरिएका स्थानीय तहका कतिपय क्षेत्रमा खानेपानीसमेत अभाव छ ।
रामेछाप नगरपालिका,मन्थली नगरपालिका,लिखु तामाकोशी गाउँपालिका,खाँडादेवी गाउँपालिका लगायतका पालिकाहरुको सबै घरहरुमा शौचालय बने पनि, पानीको अभावले प्रयोगमा समस्या भएको स्थानीय नमिता महतले बताउनुभयो ।
जिल्लाको धेरै बजार क्षेत्रहरुमा सार्बजनिक शौचालय नबन्दा र भएका शौचालय व्यवस्थित नहुँदा खुला दिसामुक्त जिल्ला नारामा सिमित भएको छ ।
