रामेछापको मन्थलीमा दुई वर्ष अघि नै निर्माण भएको सेफ हाउस अझै सञ्चालन हुन सकेको छैन । सेफ हाउस सञ्चालनमा नआउँदा मन्थली नगरपालिकामा घरेलु हिंसालगायत विभिन्न समस्या भोग्न बाध्य महिलालाई दिनहुँ उद्धार गरि सुरक्षित ठाउँमा राख्नुपर्ने अवस्था छ ।
तर पालिकामा व्यवस्थित र सुरक्षित आवास गृह अर्थात सेफ हाउस छैन । पालिकाले कृषि ज्ञान केन्द्रको गोदाम घरको दुईवटा कोठामा सेफ हाउस चलाइरहेको छ । सुरक्षित आवास गृहले हिंसा प्रभावितलाई पिडकबाट सुरक्षा र गाँसवाससहितको व्यवस्थापन गर्नुपर्ने भए पनि मन्थलीको यो आवास गृह व्यवस्थित छैन भने सुरक्षित पनि नभएको पीडितहरू बताउँछन् ।
तर मन्थली नगरपालिका २ मा २ वर्ष अघि निर्माण गरिएको २ तल्ले अल्पकालिन सेवा केन्द्र सेफ हाउस भने सञ्चालन भएको छैन । वागमति प्रदेश सरकारको ७० लाख र ७ लाख रुपैयाँको श्रमदानमा निर्माण गरिएको भवन अलपत्र परेको हो ।
सेफ हाउस तत्काल सञ्चालन गर्नुपर्ने स्थानीयबासिन्दाको माग छ । भवन निर्माण उपभोक्ता समितिले भवनको चाबी बुझाएको छैन । चाबी हस्तान्तरणका लागि पटक पटक अनुरोध गरेपनि नपाएको मेयर लब श्रेष्ठले बताउनुभयो ।
