रामेछापको सुनापति गाउँपालिकाले दलित परिवाजनका लागि निःशुल्य स्वास्थ्य विमा सञ्चालन गरेको छ । गत आर्थिक वर्ष २०७६र०७७ देखि सञ्चालनमा ल्याएको दलित घर परिवारका सदस्यहरुको निःशुल्क स्वास्थ्य विमा कार्यक्रमलाई पालिकाले चालु आर्थिक वर्ष पनि निरन्तरता दिएको हो । पालिकाले प्रतिव्यक्ति ३ हजार ५ सय रुपैयाँ तिरेर विमा गरेको सुनापति गाउँपालिकाका अध्यक्ष धावा लामाले जानकारी दिनुभयो ।
गत आर्थिक वर्ष २ सय ८ घर परिवारको निःशुल्क स्वास्थ्य विमा गरेको पालिकाले चालु आर्थिक वर्ष २०७७र०७८ को १० लाख रुपैयाँ बजेटबाट हाल निःशुल्क स्वास्थ्य बिमाको कार्यक्रम सञ्चालन गरिरहेको अध्यक्ष लामाले बताउनु भएको छ । अब स्वास्थ्य बिमा गरेका दलित परिवारका सदस्यहरुले एक लाख रुपैयाँसम्मको निःशुल्क उपचार पाउने भएका छन् । एक जनाको बिमा गरेपछि त्यस परिवारको पाँच जनाले एक लाख रुपैयाँसम्मको निःशुल्क स्वास्थ्य उपचार सेवा लिन पाउने छन् ।
५ वटा वडा रहेको पालिकाले पालिका अन्तर्गतका सबै दलित घर परिवारका सदस्यहरुको स्वास्थ्य बिमा गरिदिएको अध्यक्ष लामाले बताउनुभयो । अहिले उनीहरुको घरमै पुगेर स्वास्थ्य बिमा गरिदिने कार्यक्रम सञ्चालन भइरहेको उहाँको भनाई छ । यस्तै, गत वर्ष दलित घर परिवारका सदस्यहरुको मात्रै निःशुल्क स्वास्थ्य बिमा गरेको पालिकाले यस वर्षदेखि सीमान्तकृत समुदाय माझी र पहरीका घर परिवारका सदस्यहरुको पनि स्वास्थ बिमा गरिदिने नीति लिएको सुनापति गाउँपालिकाका सूचना अधिकारी सन्तोष चौलागाईले जानकारी दिनुभयो । तर, निःशुल्क गर्ने कि शुल्क लिएर गर्ने भन्ने विषयमा हालसम्म कुनै पनि निर्णय नभएको सूचना अधिकारी चौलागाईले बताउनुभयो ।
