रामेछापको पुरानो सदरमुकाम समेत रहेको रामेछाप नगरपालिकाको केन्द्र रामेछाप बजारको सडक अब भने तत्कालै कालोपत्रे हुने भएको छ । सेलेघाट–रामेछाप–साँघुटार सडक आयोजना अन्तर्गत पर्ने यो सडकको मापदण्ड क्षेत्र भित्रपर्ने घर टहरा भत्काउन थालिएको हो ।
बजार क्षेत्रमा भत्किने घरहरुकोे मुआब्जा वितरण भैसकेको तर रकम लिएर पनि घर नभत्काएपछि वडा कार्यालयले अन्तिम पटक १५ दिने सूचना जारी गरेको थियो । वडा कार्यालयले अन्तिम सूचना जारी गरे लगतै घर टहरा भत्काउने काम भएको हो ।
अहिले बजार क्षेत्रमा सडकको लेबल मिलाउने,पर्खाल लगाउने, घर टहरा भत्काउने लगायतका कामहरु भैरहेको छ । रामेछाप मानेँडाँडा बुद्धचोकदेखी माथिल्लो बजारसम्म करिब १५ सय मिटर(१.५) किलोमिटर सडक अब भने केही महिनाभित्रै कालोपत्रे हुने वडा नं ८ का वडाअध्यक्ष वडाअध्यक्ष सन्तोष तामाङले बताउनुभयो ।
रामेछापको मन्थली नगरपालिका–६ सेलेघाटदेखि रामेछाप बजार हुँदै साँघुटारसम्म गरी करिब ५० किलोमिटर दुरीमा रहेको निर्माणाधीन सेलेघाट–रामेछाप–साँघुटार सडकको काम सुस्त गतिमा अघि बढेको छ । अहिलेसम्म सलेघाटदेखी ल्याङल्याङसम्म करिब ११ किलोमिटर सडक कालोपत्रे भएको छ ।
बजार क्षेत्रको मुख्य सडकको अवस्था दयनिय बनेपछि नागरीक,स्थानिय सरकार लगायत सरोकारवालाहरुले सडक छिटो मर्मत र स्तरोन्नति गर्न बारम्बार आग्रह गर्दै आएका थिए । निर्माण कम्पनीले रामेछाप बजारको काम तत्कालै सकेर बाँकी काम पनि अघि बढाउने तयारी गरेको हो ।
भारतीय एक्जिम बैङ्क मार्फत बन्ने योे सडक निर्माणको जिम्मा भारतीय निर्माण कम्पनी टेलिकम्युनिकेसन इन्डिया लिमिटेड (टीसीआईएल)ले पाएको छ । सो कम्पनीले नेपाली निर्माण व्यवसायीलाई काम जिम्मा दिएको छ ।
सन् २०२० को नोभेम्बर ११ मा सुरु भएको आयोजना २०२३ को मे १० भित्र कूल १ अर्ब ९४ करोड ७१ लाख रुपैयाँमा सक्नुपर्ने गरी सम्झौता भएको थियो । निर्धारित समयमा काम सम्पन्न नभएपछि निर्माण कम्पनीले बारम्बार म्याद थप्दै लगेको थियो । अब भने द्रुत गतिमा काम हुने अपेक्षा नागरीकको छ ।
यस्तो छ बजारको अवस्था :
