रामेछापको गोकुलगंगा गाउँपालिका वडा नं ६ फर्फुमा शुक्रबार (आज) फोर्स गाडी दुर्घटना भएको छ । आज दिउँसो अन्दाजी १ः५० बजेको समयमा भएको गाडी दुर्घटनामा वडाअध्यक्ष सहित ५ जनाको मृत्यु भएको छ । गोकुलगंगा गाउँपालिका वडा नं ४ का वडाअध्यक्ष रामचन्द्र बस्नेत सहित ५ जनाको घटनास्थलमै मृत्यु भएको हो ।
मृत्यु हुनेहरुमा गाडी चालक रामेछापको मन्थली नगरपालिका वडा नं. १० चिसापानी का बर्ष ३५ को हिरा बहादुर काकी,रामेछापको गोकुलगंगा गाउँपालिका. ५ बस्ने बर्ष ३० की कविता कार्की खड्का,कविताकी छोरी बर्ष ७ की स्वस्तिका खड्का र एक जना मृतकको नामथर, ठेगाना नखुलेको रामेछाप प्रहरीले जानकारी दिएको छ ।
काठमाण्डौँबाट रामेछापको बेताली आउँदै गरेको ना १ ज ७१२३ नम्बरको गाडी दुर्घटनामा परेको हो । दुर्घटनामा ३ जना घाइते भएका छन । कास्की जिल्ला लेखनाथ नगरपालिका.घर भएको बर्ष ४२ को केशव शर्मा,रामेछापको गोकुलगंगा गाउँपालिका ४ बेतालीका बर्ष २७ की सरस्वती कार्की र अन्दाजी ४ बर्षको नाम थर वतन नखुलेको बालकको मन्थली अस्पतालमा उपचार भैरहेको छ । घाइतेहरुको अवस्था मध्यम रहेको रामेछाप प्रहरीले जानकारी दिएको छ ।
दुर्घटना भएको गाडी सडकबाट करिब ३ सय मिटर तल खसेको जिल्ला प्रहरी कार्यालय रामेछापका प्रमुख एवं डिएसपी प्रदिप कुमार सिंहले जानकारी दिनुभयो ।
