डिभिजन बन कार्यालय रामेछापले जिल्ला अस्पताल रामेछापको मूल ढोका नजिक करिब २५ लाख रुपैयाँको लगानीमा सैनिक स्मृती पार्क निर्माण गरेको छ । पार्क निर्माण सम्पन्न भएको एक वर्ष भन्दा बढि भइसकेको भएपनि उद्घाटन भने हुन सकेको छैन । निर्माण सम्पन्न भएको यतिका समय भइसकेको भएपनि पार्क किन उद्घाटन हुन सकेन भनेर चौतर्फी आलोचना भइरहेको छ ।
रामेछाप नगरपालिका ८ का राम बहादुर थापाले आफ्नो टोलमा बनेको पार्क उद्घाटन नहुँदा संचालनमा आउन नसकेको बताए । उनले भने,‘कस्को स्वार्थ पुरा भएन,के कारणले पार्क उद्घाटन नभएको हो ? सम्बन्धित निकाय यस विषयमा किन मौन छ ?’
१ वर्ष अघि नै घेराबारा सहित निर्माण भएको पार्क निर्माण सम्पन्न भएको लामो समय वितिसक्दा समेत उद्घाटन हुन सकेको छैन । डिभिजन वन कार्यालयको कुल २५ लाख रुपैयाँ र श्रमदान १० प्रतिशत(एक लाख रुपैयाँ) गरी कुल २६ लाखको लागतमा स्थानीय उपभोक्ता समितिले २०८० साल असार १३ गते नै काम सम्पन्न गरिसकेको भएपनि पार्क संचालनमा आउन नसकेको हो ।
२०६६ वैशाख १० गते जिल्ला अस्पताल नजिकैको वादी पाखा सामुदायिक बनको जङ्गलमा लागेको आगो निभाउने क्रममा तत्कालीन १३ जना सैनिक जवानहरूले डढेलोमा परेर ज्यान गुमाएका थिए । त्यसैको सम्झनामा १३ मध्य अन्यको नाम शिला लेखमा रहने र एक जना कमान्डरको भने सालिक राख्ने गरी स्टमेट भएको थियो ।
स्टमेट अनुसार काम भएर भुक्तानी समेत भएको भए पनि पार्क उद्घाटन नहुदा संचालनमा आउन नसकेको उपभोक्ता समितिका सचिव जीवन कुमार श्रेष्ठले बताए । उनले भने पार्क उद्घाटन नुहँदा निर्माण भएका संरचनाहरुमा पनि क्षति हुन थालेको छ ।
डिभिजन बन कार्यालय रामेछापका प्रमुख उमाशंकर जैसवालले आफुले यहि भदौ ६ गतेदेखी कार्यालय प्रमुखको जिम्मेवारी सम्हालेको बताउँदै के कारणले पार्क उद्घाटन हुन नसकेको रहेछ बुझेर तत्काल उद्घाटनको तयारी थाल्ने बताए ।
यस भन्दा अघिका डिभिजन वन अधिकृत ओम सागर भण्डारीका कारण पार्क उद्घाटन हुन नसकेको विशेष स्रोतले बताएको छ । उनले पार्क आफ्नो कार्यकालमा निर्माण भएका कारण ताम्रपत्रमा आफना्े नाम उल्लेख गर्नुपर्ने बताएका थिए । पार्क निर्माणको जिम्मा पाएको उपभोक्ता समितिका एक पदाधिकारीका अनुसार तत्कालिन वन अधिकृत भण्डारीले आफ्नो पहलमा बनेको पार्क भएका कारण सो पार्क आफुले उद्घाटन गर्नपर्ने बताएका थिए ।
उपभोक्ता समितिले वन कार्यालयद्धारा निर्मित पार्क लेखेर ताम्रपत्र तयार गरेर उद्घाटन गर्ने सम्पुर्ण तयारी १ वर्ष अघि नै गरिसकेको थियो । तर तत्कालिन वन अधिकृत भण्डारीले ताम्रपत्रमा आफ्नो नाम उल्लेख गर्न आग्रह गरे ।
उपभोक्ता समितिले पनि सोही अनुसार ताम्रपत्रमा भण्डारीको नाम उल्लेख गरेर बारम्बार उद्घाटनको लागी आग्रह गर्दा पनि बेवास्ता गरेको उपभोक्ता समितिको भनाई छ । फेरी के स्वार्थ पुरा भएन कुन्नी त्यस पछि पार्क उद्घाटन हुनै सकेन । जसका कारण अहिले निर्माण सम्पन्न भएको पार्क बेवारिसे अवस्थामा छ ।
रामेछाप नगरपालिकाका वडा नं ८ का वडाअध्यक्ष सन्तोष कुमार तामाङ्गले पार्क उद्घाटनको लागी आफुहरुले पनि वन कार्यालयलाई बारम्बार आग्रह गरेको बताए । धेरै पटक वन कार्यालय र नेपाली सेनाको ब्यारेकसँग कुराकानी भएको भएपनि अहिलेसम्म उद्घाटन भने हुन नसकेको उनले बताए ।
वडा कार्यालयले पनि पार्क अगाडी रहेको पुरानो स्तुपालाई पार्क भित्र लगेर निर्माण गर्नका लागि ३ लाख रुपैयाँ बजेट विनियोजना गरेको बताए । २०७२ को भूकम्पले चिराफारा भएको स्तुपालाई पार्क भित्र स्थानान्तरण गरेपछि अझै पार्कको सौन्दर्यता बढ्ने वडाअध्यक्ष तामाङ्गको भनाई छ ।
२५ लाख लागतमा निर्माण भएको पार्कमा वरिपरि घेराबार,गेट, शिला लेख र एक जना सैनिक कमान्डरको सालिक भन्दा बाहेक अन्य कुनै संरचना छैन । यतिको संरचना निर्माणको लागी २५ लाख खर्च भयो भन्दा पत्याउनै गाह्रो पर्छ । पार्क निर्माण सम्पन्न नभइकन वन कार्यालले भुक्तानी दिएको समाचार समेत बाहिरीएको थियो ।
यो पार्क निर्माणको क्रममा आर्थिक हिनामिना भएको हुनसक्ने आशंका गर्ने ठाउँहरु धेरै छन । यहि कारणले पनि पार्क उद्घाटन हुन नसकेको हुन सक्ने यहाँका नागरीहरुको भनाई छ । बनेको पार्क एक वर्षभन्दा बढी समयसम्म उद्घाटन हुन नसक्नु दुुखको कुरा हो । उद्घाटन हुन नसक्नुका अनेकौँ कारणहरु होलान तर व्यक्तिगत स्वार्थ पुरा नहुँदा बनेका संरचनाहरु बिगार्ने छुट कसैलाई छैन । तत्कालै यो पार्क उद्घाटन भएर संचालनमा आउनु जरुरी छ ।
